ახალმა უკრაინულმა ავიაკომპანია SkyUp-მა 5 ერთეულ Boeing 737 MAX-ზე გააკეთა შეკვეთა, რომლის ღირებულებაც 624 მლნ დოლარია.
გავრცელებული ინფორმაციით, თვითმფრინავების შეძენისთვის SkyUp-მა პირველი ტრანში უკვე გადარიცხა.
შეკვეთა ორ ერთეულ Boeing 737 MAX 8-სა და სამ ერთეულ Boeing 737 MAX 10-ს მოიცავს, რომელსაც Boeing-ი დამკვეთს სიეტლის ქარხნიდან 2023 წლისთვის მიაწვდის.
ავიაკომპანიაში აცხადებენ, რომ მათ გეგმაშია ფრენების შესრულება თურქეთის, ეგვიპტის, ესპანეთის და სხვა მიმართულებებით და აღნიშნული მოდიფიკაციის თვითმფრინავებს შედარებით მცირე საოპერაციო ხარჯი გააჩნიათ, რაც საბოლოო ჯანზე ავიაბილეთების ფასზეც ჰპოვებს ასახვას.
აღსანიშნავია, რომ SkyUp-ი საერთაშორისო ჩარტერული ავიარეისების განხორციელებას აპრილიდან იწყებს.
ხოლო ივნისიდან ავიაკომპანია შიდა რეისების განხორციელებასაც დაიწყებს და ოპერირებას კიევი-ოდესა და ხარკოვი-ოდესასმიმართულებებზე განახორციელებს.
რაც შეეხება რეგულარულ ფრენებს, ავიაკომპანია SkyUp-ი მის დაწყებას შემოდგომიდან გეგმავს და კიევიდან ბარსელონასა და ლარნაკას მიმართულებით იფრენს.
საწყის ეტაპზე SkyUp-ის ფლოტი 3 თვითმფრინავს: Sky Interior-ის სალონის მქონე ორ 189 ადგილიან Boeing 737-800-სა და ერთ 149 ადგილიან Boeing 737-700-ს აერთიანებს.
SkyUp-ის ინფორმაციით, სამივე თვითმფრინავი უკრაინის საავიაციო ხელისუფლების მიერ რეგისტრაციაში აპრილის დასაწყისში იქნება გატარებული.
ამ დრომდე გადაწყვეტილი არ არის, თუ კიევის რომელ აეროპორტში მოახდენს SkyUp-ი ბაზირებას, ავიაკომპანია მოლაპარაკებებს აწარმოებს, როგორც ბორისპოლის ასევე ჟულიანის აეროპორტთან.
