პოეტი დავით მაღრაძე ქართული პენცენტრის პრეზიდენტის თანამდებობიდან გადადგა. შესაბამისი წერილით მან უკვე მიმართა საერთაშორისო პენ ცენტრის პრეზიდენტს, ჯონ რალსტონ საულს და საერთთაშორისო პენ ცენტრის საერთაშორისო მდივანს, იუჯინ შელგინს.
"მინდა გაცნობოთ, რომ ბოლო ერთი კვირის მანძილზე ჩემს უცხოელ პარტნიორ გამომცემლებთან ერთად ვადგენდი მომავალი ერთი წლის შემოქმედებით გრაფიკს, სადაც განსაზღვრულია ჩემი წიგნის პრეზენტაციები: სტამბულში, ტრაბზონში, ჰელსინკში, ნიუ-იორკში, მოსკოვში, მილანში და ასე შემდეგ. აგრეთვე მომავალი წლის ოქტომბრის თვეში, როცა საერთაშორისო ფესტივალის გამართვა დაგეგმილია თბილისში, სწორედ ამ დროს მიწვეული ვარ მაკედონიაში პოეზიის ფესტივალზე. მსურს კიდევ ერთხელ დავადასტურო ჩემი თქვენდამი პატივისცემა და მადლიერება მხარდაჭერისთვის. ყოველივე ზემოთხსენებულის გამო და კიდევ იმის გამო, რომ ქართული პენ ცენტრის უკანასკნელი განცხადების ტექსტზე, რომელიც თქვენც გამოგეგზავნათ, ჩემთან შეუთანხმებლად, ხელმომწერთა შორის გაჩნდა ჩემი სახელი და გვარი, გთხოვთ მიიღოთ ცნობად ჩემი გადაწყვეტილება ქართული პენ ცენტრის პრეზიდენტის თანამდებობიდან გადადგომის შესახებ", - ნათქვამია დავით მაღრაძის წერილში, რომელიც მან ჯონ რალსტონ საულს და იუჯინ შელგინს მისწერა.
აღნიშნული წერილის მიხედვით, დავით მაღრაძე იმედოვნებს, რომ ახალი საორგანიზაციო ჯგუფი, რომელშიც მისი თქმით, "არიან ძალზედ ნიჭიერი მწერლები და გამომცემლები", ეფექტურად გაართმევენ თავს აღებულ ვალდებულებებს.
ცნობისათვის, დათო მაღრაძე ქართულ პენ ცენტრს 1997 წლიდან ხელმძღვანელობს.
