ბათუმის ბულვარში, ტურისტული სეზონისათვის მოსამზადებელი მასშტაბური ინფრასტრუქტურული პროექტების განხორციელება მიმდინარეობს. კაპიტალური სამშენებლო სამუშაოები ძველი და ახალი ბულვარის ტერიტორიაზე რამდენიმე მიმართულებით მიმდინარეობს.
- ბათუმის ბულვარის ტერიტორიაზე არსებული არდაგანის ტბიდან აკვაპარკამდე და კობალაძის ქუჩის მიმდებარე ტერიტორიების (ე.წ. ალეების) კეთილმოწყობის სამუშაოები.
აღნიშნულ ტერიტორიებზე, რეაბილიტაცია ჩაუტარდება 13 100კვ.მ მოცულობის საფეხმავლო ბილიკს. ბილიკები ახალი დეკორატიული ფილებითა და ბაზალტის ბორდიურებით კეთილმოეწყობა. განხორციელდება მიწისქვეშა სამუშაოები, კერძოდ: საკომუნიკაციო მილებისა და სადრენაჟე ჭების მოწყობა.
- სასტუმრო "კოლიზეუმიდან" სანაპიროზე ასასვლელი პანდუსების და კიბის მოწყობაა დაგეგმილი, რომელიც სრულად იქნება ადაპტირებული შეზღუდული შესაძლებლობების მქონე პირთათვის. პროექტის განსახორციელებლად ბათუმის ბულვარის ბიუჯეტიდან 909 ათას 9 ლარია გამოყოფილი. აღნიშნულ სამუშაოებს კომპანია "ჯორჯიან სტოუნი" ახორციელებს.
ინფრასტრუქტურული სამუშაოები მიმდინარე წლის 7 ივნისამდე დასრულდება.
- ბათუმის ბულვარში ფეხით მოსიარულეთა ბილიკის [პრომინადის] დაზიანებული ადგილების რეაბილიტაცია მიმდინარეობს. პლაჟის გასწვრივ 2100 გრძ.მ. სასეირნო ბილიკზე რკინაბეტონის ახალ საფარი დაიგება. პლაჟის გასწვრივ, პრომინადზე მიმდინარე კაპიტალური სამუშაოები პირველ მაისამდე უნდა დასრულდეს, რისთვისაც ბიუჯეტიდან 148 ათას 895 ლარი დაიხარჯება. აღნიშნულ სამუშაოებს შპს „ვექტორი 2015“ ახორციელებს.
- პარალელურად, ძველ ბულვარში კაფე-ბარი “ფანტაზია"-ს (ე.წ.რვაფეხას) შენობის მიმდებარედ, ტერიტორიის დეკორატიული ფილებითა და ბაზალტის ბორდიურების კეთილმოწყობა მიმდინარეობს. ამ ეტაპისათვის, აღნიშნულ ლოკაციაზე სადემონტაჟო სამუშაოები და სამშენებლო ნაგავის გატანა ხორციელდება.
