საქართველოს ბანკის ჯგუფის გაყოფით წარმოქმნილი ორი დამოუკიდებელი კომპანიის ლისტინგი, ლონდონის საფონდო ბირჟაზე მაისის ბოლოს მოხდება, - ამის შესახებ BGEO ჯგუფის გენერალურმა დირექტორმა ირაკლი გილაურმა განაცხადა.
"იმედია მალე დაგპატიჟებთ ლონდონში გაყოფაზე, ჟურნალისტებს გეპატიჟებით“ - ირაკლი გილაურმა საინვესტიციო და საბანკო მიმართულებების გაცალკევების სქემა წარმოადგინა.
საქართველოს ბანკი, 1.3 მლრდ-ის კაპიტალიზაციით იქნება წარმოდგენილი, საქართველოს კაპიტალი კი 800 მლნ-ით. ამასთან , საინვესტიციო კომპანიის 19.9%-იანი წილი "საქართველოს ბანკში" ხმის უფლები გარეშე იქნება, კონტროლის გამორიცხვის შესაძლებლობით.
გილაურის თქმით, მიზანი საქართველოში ინსტიტუციების განვითარებაა, მოძლიერების შემდეგ კომპანია სტრუქტურიდან გამოვა და სხვაში გადაინაცვლებს იმავე მიზნისთვის.
გაყოფა მოხდება ყველა დონეზე - საბანკო და საინვესტიციო მიმართულებას დამოუკიდებელი სამეთვალყურეო საბჭო ეყოლება, რომლებსაც ერთმანეთთან არავითარი კვეთა არ ექნებათ და აქციონერებიც ამ მიმართულებით გაიყოფიან.
ამ პროცესის დასრულების შემდეგ, BGEO-დან ლონდონის საფონდო ბირჟაზე 3 კომპანია იქნება წარმოდგენილი.
