საქართველოს პრემიერ-მინისტრი მთავრობის სხდომაზე, პირდაპირი უცხოური ინვესტიციების 2017 წლის წინასწარ მაჩვენებლებს გამოეხმაურა და აღნიშნა, რომ "ზრდა იყო ძალიან შთამბეჭდავი".
"ძალიან შთამბეჭდავი ზრდა გვქონდა 2017 წელს - ეს გახლავთ 16.2%-იანი ზრდა, ანუ 260მლნ. აშშ. დოლარით გაიზარდა პირდაპირი უცხოური ინვესტიციები წინა წელთან შედარებით.
ძალიან ბევრ სექტორში დაფიქსირდა ზრდა, განსაკუთრებით მინდა აღვნიშნო, რომ 39-%-იანი ზრდა არის, ანუ 615 მლნ. აშშ. დოლარი შეადგინა ინვესტიციების მოცულობამ ეკონომიკის რეალურ სექტორში, რაც არის ძალიან მნიშვნელოვანი სამუშაო ადგილების შექმნის თვალსაზრისით, ახალი ტექნოლოგიების შემოტანის კუთხით და რა თქმა უნდა, ეს პოზიტიურად აისახება წლევანდელ ექსპორტისა და დასაქმების ზრდაზე.
ასევე, ყურადღება მინდა გავამახვილო იმაზე, რომ რეინვესტირების მაჩვენებლის თითქმის 130%-იანი ზრდა გვქონდა, რაც არის მართლაც და უპრეცედენტო მაჩვენებელი და ეს არის პირდაპირი შედეგი მოგების გადასახადის იმ რეფორმისა, რომელიც 2017 წლის პირველ იანვარს დავიწყეთ ჩვენს ქვეყანაში", აცხადებს პრემიერ-მინისტრი.
კვირიკაშვილს მიაჩნია, რომ სწორედ, მოგების გადასახადის გაუქმება და არამხოლოდ რეინვესტირებული, არამედ გაუნაწილებელი მოგების გათავისუფლებამ მოგების გადასახადისაგან ქვეყანას მოუტანა ძალიან სახარბიელო შედეგი რეინვესტირების მაჩვენებლის ზრდაში და ეს ტენდენცია აუცილებლად აისახება 2018 წლის ეკონომიკურ მაჩვენებლებზეც.
"რათქმაუნდა, ჩვენ არ ვართ თვითკმაყოფილებაში, ჩვენს ქვეყანაში არის უამრავი გაჭირვებული ადამიანი, გვყავს ბევრი სოციალურად დაუცველი, მაგრამ გზა, რომელსაც ჩვენ ვადგავართ, არის ეკონომიკური განვითარების ის მოდელი, ითვალისწინებს ისეთ ეკონომიკურ ზრდას, რომელიც თანდათანობით აუცილებლად აისახება ჩვენი თანამოქალაქეების სოციალურ ყოფაზე. დამერწმუნეთ, ის დინამიკა და ის ციფრები, რომელზეც ჩვენ ვსაუბრობთ, აუცილებლად აისახება ჩვენი თითოეული თანამოქალაქის ყოფაზე.
ჩვენ ასევე, სულ ცოტა ხნის წინ დავიწყეთ ბრუნვის გადასახადის რეფორმა მიკრო-ბიზნესებისა და მცირე-ბიზნესებისთვის, ჩვენ ასევე ვამზადებთ შემდეგ, ძალიან მნიშვნელოვან ეტაპს, რომელიც განსაკუთრებულად იქნება ფოკუსირებული მცირე და საშუალო საწარმოებზე, სპეციალური დაფინანსების ინსტრუმენტების შექმნაზე. დარწმუნებული ვარ, რომ ეს კიდევ უფრო მეტად აისახება მცირე ბიზნესზე, მოსახლეობის იმ ფენაზე, რომელსაც ყველაზე მეტად უჭირს დღეს და რომლისკენაც ყველაზე მეტად არის საჭირო სახელმწიფო რესურსის მიმართვა იმისათვის, რომ მეწარმეობა წავახალისოთ, მცირე ბიზნესის სეგმენტში. ასე რომ, მგონია, რომ ეს ნაბიჯები ძალიან სერიოზულ შედეგს მოიტანს და 2018 წლის მაჩვენებლებიც იქნება ასეთივე პოზიტიური", აღნიშნა გიორგი კვირიკაშვილმა.
