საქართველოს შინაგან საქმეთა სამინისტრო იუსტიციის სახლთან ერთი პირის დაკავებასთან დაკავშირებით განცხადებას ავრცელებს.
უწყების ინფორმაციით, 1962 წელს დაბადებული გურამ ფალავანდიშვილი ადმინისტრაციულ სამართალდარღვევათა კოდექსის 166-ე მუხლით დააკავეს, რაც წვრილმან ხულიგნობას გულისხმობს
„იუსტიციის სახლის მიმდებარე ტერიტორიაზე, ორგანიზაცია „ქალთა მოძრაობის“ ორგანიზებით მიმდინარე აქციის პარალელურად, "მართლმადიდებელ მშობელთა კავშირის" წევრები კონტრაქციის გამართვის მიზნით შეიკრიბნენ. სამართალდამცველები იუსტიციის სახლის მიმდებარე ტერიტორიაზე ორი აქციის წევრებს შორის დაპირისპირების და მათი უსაფრთხოების დაცვის მიზნით იმყოფებიან.
საპატრულო პოლიციის თანამშრომლებმა, შესაძლო ინციდენტის თავიდან აცილების მიზნით ორგანიზაცია „ქალთა მოძრაობის“ და "მართლმადიდებელ მშობელთა კავშირის" წევრები ერთმანეთს მოარიდეს.
აქციის მიმდინარეობისას კონტრაქციის ერთ-ერთმა წევრმა საზოგადოებრივი წესრიგი დაარღვია და მოქალაქეების მისამართით კვერცხებს ისროდა.
საპატრულო პოლიციის თანამშრომლებმა აღნიშნულ ქმედებაზე, მყისიერი რეაგირება მოახდინეს და 1962 წელს დაბადებული გ.ფ. ადმინისტრაციულ სამართალდარღვევათა კოდექსის 166-ე მუხლით დააკავეს, რაც წვრილმან ხულიგნობას გულისხმობს“, - ნათქვამია შსს-ს მიერ გავრცელებულ განცხადებაში.
ცნობისთვის, თბილისში, იუსტიციის სახლთან ტრანსგენდერი ქალების უფლებების დასაცავად აქცია გაიმართა.
აქციის პარალელურად კონტრაქციაც მიმდინარეობდა.
კონტრაქციის მონაწილეებმა ტრანსგენდერ ქალებს და აქციის სხვა მონაწილეებს კვერცხები ესროლეს. შემთხვევის შედეგად, კონტრაქციის ერთ-ერთი მონაწილე პოლიციამ დააკავა.
