პოლიციის პოლკოვნიკზე, დავით როსტომაშვილზე თავდასხმაში, ერთ-ერთი ბრალდებულის ზურაბ ქუთელიას ადვოკატი, გიორგი ბარდაველიძე „ჯი-ეიჩ-ენთან“ საუბარში აცხადებს, რომ ვიდეოჩანაწერში დავით როსტომაშვილზე თავდასხმაში მხოლოდ ერთი პირის მონაწილეობა ჩანს.
„ბექა კირვალიძის ჩვენებით გამოიკვეთა ის, რომ მას მხოლოდ დავით როსტომაშვილის ცემის განზრახვა ჰქონდა და სხვა განზრახვას ადგილი არ ჰქონია. მან განმარტა ისიც, რომ ყაჩაღობაზე არ წავიდოდა, რადგან ასაკოვანი მშობლები ჰყავს. მით უმეტეს ის წარსულში ნასამართლევია და ძალიან კარგად იცნობს სამართლებრივ სივრცეს და იმ პასუხისმგებლობას რომელიც მას ამ ქმედების შედეგად დაეკისრებოდა. ქუთელია შემთხვევის დღეს სავარჯიშო დარბაზში იმყოფებოდა. იქიდან გამომდინარე რომ მას მართვის მოწმობა არ აქვს მის კუთვნილ ავტომობილზე მეგობარი დასვა და მეგობრის სანახავად წავიდნენ. ვიდეოჩანაწერში ჩანს, თუ როგორ ანხორციელებს ბექა კირვალიძე დავით როსტომაშვილის ცემის ფაქტს. ზურაბ ქუთელია კი საერთოდ არ ჩანს. ის მხოლოდ იმ ტერიტორიულ ერთეულში მდებარე აფთიაქის სათვალთვალო კამერით გადაღებულ ვიდეოჩანაწერში ჩანს. რაც შეეხება არტემ აგაჯანოვს, ბექა კირვალიძემ განაცხადა, რომ მას უბნიდან იცნობს და თხოვა, რომ შემთხვევის ადგილზე დაეტოვებინა შემდეგ წასულიყო. მე რომ როსტომაშვილის დაყაჩაღება მდომებოდა აგაჯანოვს ვთხოვდი დამლოდებოდა და მისივე მანქანით წავიდოდიო - განუცხადა მოსამართლეს. მან შემთხვევის ადგილი ფეხით დატოვა და სხვა მიმართულებით გაიქცა“ - განუცხადა „ჯი-ეიჩ-ენს“ ბრალდებულ ზურაბ ქუთელიას ადვოკატმა გიორგი ბარდაველიძემ.
შეგახსენებთ, რომ ბექა კირვალიძეს წარდენილი აქვს 179-ე მუხლის მე-2 ნაწილის "ბ" და მე-3 ნაწილის "ა" ქვეპუნქტები, 238-ე პრიმა მუხლის მეორე ნაწილით და 379-ე მუხლის პირველი ნაწილით. ითვალისწინებს თავისუფლების აღკვეთას რვიდან თორმეტ წლამდე. არტემ აგაჯანოვს წარდგენილი აქვს 25-179-ე მუხლის მეორე ნაწილის "ბ" ქვეპუნქტი , ითვალისწინებს ექვსიდან ცხრა წლამდე. ზურაბ ქუთელიას წარდგენილი აქვა 179-ე მუხლის მეორე ნაწილის "ბ" ქვეპუნქტი ითვალისწინებს ექვსიდან ცხრა წლამდე თავისუფლების აღკვეთას.
