პოლიციის პოლკოვნიკზე, დავით როსტომაშვილზე თავდასხმაში ბრალდებულები ამ წუთებში თბილისის საქალაქო სასამართლოში ჩვენებას აძლევენ.
როგორც ერთი-ერთ ბრალდებულის ზურაბ ქუთელიას ადვოკატმა, გიორგი ბარდაველიძემ „ჯი-ეიჩ-ენთან“ საუბარში განაცხადა, მისი დაცვის ქვეშ მყოფი აბსოლუტურად უდანაშაულოა. ის როსტომაშვილის შვილის მეგობარია და მისთვის გაუგებარია თუ რატომ მოხდა საერთოდ მისი ამ დანაშაულთან დაკავშირება.
ზურაბ ქუთელია დანაშაულში არ მონაწილეობდა, შესაბამისად ის უდანაშაულოა და სასამართლოსაც მხოლოდ სიმართლეს განუცხადებს. მას თავის მართლება ან რაიმე ალიბი არ სჭირდება, არადა ამის საშუალება მას ჰქონდა. ქუთელიას უდანაშაულობას ადასტურებს არა მხოლოდ საქმეში არსებული მასალები, არამედ მოწმეთა ჩვენებები. ზურაბ ქუთელიას მხოლოდ დავით როსტომაშვილი და მისი ქალიშვილი ადებენ ხელს. თუ რა ინტერესი ჰქონდათ მათ ქუთელიას წინააღმდე, ამასთან დაკავშირებით ჟურნალისტების მხრიდან მათ უამრავჯერ დაესვათ კითხვა. თუმცა ამაზე პასუხი მათ არ გააჩნიათ.
„ზურაბ ქუთელიას დავით როსტომაშვილის მიმართ არანაირი ინტერესი არ ჰქონია და ვერ ექნებოდა, რადგან ის მის შვილთან მეგობრობდა და მეგობრობს. მათ ოჯახთანაც საკმაოდ კარგი ურთიერთობა ჰქონდა, შესაბამისად გამორიცხულია ზურაბ ქუთელიას მსგავსი რამ ჩაედინა. ვიმეორებ ის მხოლოდ როსტომაშვილის და მისი ქალიშვილის საფუძველზეა დაკავებული. ეს ჩვენება როსტომაშვილმა გამოძიებას მაშინ მისცა როცა ბრალდების მხარეს დანაშაულში მონაწილე არცერთი პირი ხელთ არ ჰყავდა“ - აცხადებს ბარდაველიძე.
შეგახსენებთ, რომ ბექა კირვალიძეს წარდენილი აქვს 179-ე მუხლის მე-2 ნაწილის "ბ" და მე-3 ნაწილის "ა" ქვეპუნქტები, 238-ე პრიმა მუხლის მეორე ნაწილით და 379-ე მუხლის პირველი ნაწილით. ითვალისწინებს თავისუფლების აღკვეთას რვიდან თორმეტ წლამდე. არტემ აგაჯანოვს წარდგენილი აქვს 25-179-ე მუხლის მეორე ნაწილის "ბ" ქვეპუნქტი , ითვალისწინებს ექვსიდან ცხრა წლამდე. ზურაბ ქუთელიას წარდგენილი აქვა 179-ე მუხლის მეორე ნაწილის "ბ" ქვეპუნქტი ითვალისწინებს ექვსიდან ცხრა წლამდე თავისუფლების აღკვეთას.
