თბილისის საქალაქო სასამართლოში ხორავას ქუჩაზე მოზარდების მკვლელობის საქმეზე ბრალდებულების სასამართლო პროცესი დღეს 12:00 საათზე დაიწყება.
პროცესი იმ არასრულწლოვანი მოწმის ჩვენებით განახლდება, რომელიც 51-ე სკოლის მოსწავლე იყო. მისი გამოკითხვა გუშინ დაიწყეს. როგორც დაცვის მხარე აღნიშნავს, აღნიშნული პიროვნება ერთ-ერთი მნიშვნელოვანი მოწმეა, რადგან ის 1 დეკემბერს მომხდარი ჩხუბის, რომელიც შემდეგ ორი მოზარდის მკვლელობით დასრულდა, შემსწრე და მონაწილე პირია.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
