„უმნიშვნელოვანეს დეტალებთან დაკავშირებით მოწმეთა ჩვენებები შინაარსობრივად ურთიერთგამომრიცხავია“ - განაცხადა ჟურნალისტებთან საუბრისას ხორავას ქუჩაზე, მოზარდების მკვლელობის საქმეზე ერთ-ერთი არასრულწლოვანი ბრალდებულის ადვოკატმა, ტარიელ კაკაბაძემ.
„დღევანდელ სხდომაზე დავკითხეთ ორი პირი, რომლებიც ჩხუბში მონაწილეობდნენ. მათ სასამართლოს მოახსენეს თუ რა მოხდა, როგორ დაიწყო კონფლიქტი ბიჭებს შორის, როგორ გაგრძელდეა და დასრულდა. მათი ჩვენებები დაცვის მხარისთვის განსაკუთრებულად მნიშვნელოვანია, რადგან ფაქტობრივი გარემოებები, რომლებიც ამ მოწმეებმა დაადასტურეს, მთლიანად ჯდება დაცვის მხარის სტრატეგიაში და კატეგორიულად ეწინააღმდეგება ბრალდების მხარის ძირითად ჩვენებას. მე იშვიათად მინახავს სისხლის სამართლის საქმეში მოწმეთა ჩვენებები, რომლებიც ერთმანეთს ასე კატეგორიულად ეწინააღმდეგებიან. იშვიათად მინახავს საქმე, სადაც აბსოლუტურად ყველა მოწმე, რომელიც სასამართლოში დაიკითხა, კატეგორიულად ცვლიდეს გამოძიებაში მიცემულ ჩვენებას უმნიშნელოვანეს მომენტებთან დაკავშირებით, თან არაერთხელ. დაცვის მხარეს მიგვაჩნია რომ მოწმეები ხშირ შემთხვევაში სიმართლის თქმას თავს არიდებენ და სასამართლოს გამოგონილ ინფორმაციას აწვდიან და ასევე გამოგონილი ინფორმაცია მიაწოდეს თავის დროზე საგამოძიებო ორგანოს“ - განაცხადა ჟურნალისტებთან საუბრისას ტარიელ კაკაბაძემ.
ადვოკატის ვარაუდით, მოწმეებს კონკრეტული პირები აზეპირებინენენ ჩვენებებს და მიუთითებენ თუ რა ეთქვათ სასამართლოზე.
„ნებისმიერ ადამიანს ვინც ამ მოწმეთა ჩვენებს მოისმენს გაუჩნდება განცდა, რომ კონკრეტული პირები მოწმეებს ჩვენებებს აზეპირებინებენ, ატრენინგებენ, ავარჯიშებენ. თუმცა სიმართლე ძლიერია და მოწმეებს როგორც არ უნდა დააზეპირებინონ ჩვენება, როცა სხვადასხვა ფაქტებთან დაკავშირებით მათ ჯვარედინი წესით დავკითხავთ, აუცილებლად წინააღმდეგობაში მოვლენ მათ ნათქვამთან. მიუხედავად იმისა, რომ ძალიან ბევრი მოწმე დავკითხეთ, არ არსებობს ორი მოწმეც კი რომლებმაც მსგავსი შინაარსის ჩვენება მისცეს. უმნიშვნელოვანეს დეტალებთან დაკავშირებით, მოწმეთა ჩვენებები შინაარსობრივად ურთიერთგამომრიცხავია“ - განაცხადა ტარიელ კაკაბაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
