თბილისის საკრებულოს წევრმა, კრწანისის მაჟორიტარმა დეპუტატმა, თემურ გორგაძემ მისთვის აღკვეთის ღონისძიების სახით პატიმრობის შეფარდება საპელაციო სასამართლოში გაასაჩივრა. ამის შესახებ ინფორმაცია „ჯი-ეიჩ-ენს“ მისმა ადვოკატმა, გიორგი ქუმსიაშვილმა მიაწოდა.
ადვოკატი ამჯერადაც ვერ აკონკრეტებს, თუ რის გამო მოხდა გორგაძისთვის ბრალის შემსუბუქება.
„ამ საკითხთან დაკავშირებით კომენტარს ვერ გავაკეთებ. აღკვეთის ღონისძიება, პატიმრობა სააპელაციო სასამართლოში გაასაჩივრებული გვაქვს“, - აცხადებს ქუმსიაშვილი.
ის ვარაუდობს, რომ პატიმრობაში მყოფ მაჟორიტარს დღეს სკრებულოს რიგგარეშე სხდომაზე სადეპუტატო უფლებამოსილებას შეუწყვიტავენ.
„იმასთან დაკავშირებით, თუ რა გადაწყვეტილებას მიიღებს საკრებულო, მე ვერ ვისაუბრებ. სავარაუდოდ, მას სადეპუტატო უფლებამოსილებას შეუჩერებენ“, - დასძენს ქუმსიაშვილი.
ცნობისთვის, თემურ გორგაძე 28 თებერვალს დააკავეს. მას სასამართლომ აღკვეთის ღონისძიების სახით პატიმრობა შეუფარდა.
გორგაძე სახელმწიფო უსაფრთხოების სამსახურმა ქრთამის აღების ბრალდებით დააკავა, თუმცა, მას ბრალი თაღლითობის მუხლით გადაუკვალიფცირდა.
წინასასამართლო სხდომა 19 აპრილს, 13:00 საათზე გაიმართება.
თუ კრწანისის მაჟორიტარი დეპუტატი სასამართლომ დამნაშავედ ცნო, ახალი დეპუტატის ასარჩევად შუალედური არჩევნები დაინიშნება.
