თბილისის საკრებულოს წევრისთვის, თემურ გორგაძისთვის აღკვეთის ღონისძიების შეფარდებაზე სასამართლო დღეს იმსჯელებს. ამის შესახებ „ჯი-ეიჩ-ენს“ მისმა ადვოკატმა, გიორგი ქუმსიაშვილმა განუცხადა.
„დღეს აღკვეთის ღონისძიების განხილვაა დაგეგმილი, ველოდებით, პროცესი რომელ საათზე ჩაინიშნება, მეტს ვერაფერს გეტყვით“, - აცხადებს ქუმსიაშვილი.
ადვოკატისთვის უცნობია, თუ რას უკავშირდება გორგაძისთვის მუხლის გაკვალიფიცირება. გორგაძე სახელმწიფო უსაფრთხოების სამსახურმა ქრთამის აღების ბრალდებით დააკავა, თუმცა, ბრალი თაღლითობის მუხლით წარედგინა.
„თუ რატომ გადაუკვალიფიცრდა ბრალი, ამ კითხვის ადრესატი პროკურატურაა. ჩვენს საერთოდ ბრალდებასაც არ ვეთანხმებით, ის თავს უდანაშაულოდ მიიჩნევს. დანარჩენი დეტალების გაჟღერებისგან, ამ ეტაპზე თავს შევიკავებ“, - აცხადებს ქუმსიაშვილი.
ცნობისთვის, გამოძიებამ დაადგინა, რომ გორგაძემ საქართველოს მოქალაქეს, მისი ნათესავის შეწყალების კომისიის მეშვეობით პატიმრობიდან გათავისუფლების სანაცვლოდ ქრთამის სახით მოსთხოვა 7000 ამერიკული დოლარი.
