ბათუმის ბულვარში, ინფრასტრუქტურული პროექტების განხორციელება გრძელდება. კაპიტალური სამუშაოების ფარგლებში, არდაგანის ტბიდან აკვაპარკამდე და კობალაძის ქუჩის მიმდებარე ტერიტორიებზე, დაგეგმილია სასეირნო ბილიკების ახალი დეკორატიული ფილებით კეთილმოწყობა.
აღნიშნული პროექტის ფარგლებში, რეაბილიტაცია ჩაუტარდება 13 100კვ.მ მოცულობის სასეირნო ბილიკს.
სასეირნო ხეივნებში დაზიანებული ფილების ნაცვლად ბეტონის ორშრიანი დეკორატიული ფილები დაიგება, მოეწყობა ბაზალტის ბორდიურები, განახლდება შიდა საკომუნიკაციო სისტემა და სანიაღვრე ბუნებრივი წვიმმიმღები ჭები დამონტაჟება.
სასტუმრო "კოლიზეუმიდან" სანაპიროზე ასასვლელი პანდუსების და კიბის მოწყობაა დაგეგმილი, რომელიც სრულად იქნება ადაპტირებული შეზღუდული შესაძლებლობების მქონე პირთათვის.
აღნიშნულ სამუშაოებს ელექტრონულ ტენდერში გამარჯვებული კომპანია "ჯორჯიან სტოუნი" ახორციელებს და ბათუმის ბულვარის ბიუჯეტიდან ბილიკების რეაბილიტაციისთვის, ჯამში, 1 162 942-ლარი დაიხარჯება. ინფრასტრუქტურული სამუშაოები მიმდინარე წლის ტურისტულ სეზონამდე დასრულდება.
მიმდინარე სამუშაოების გამო, არდაგანის ტბიდან აკვაპარკამდე და კობალაძის ქუჩის მიმდებარე ტერიტორიებზე არსებულ პარკირების ზონებში სატრანსპორტო საშუალებებით შესვლა დროებით შეიზღუდება. შეზღუდვები სამუშაოების დასრულებისთანავე მოიხსნება. ბოდიშს გიხდით შექმნილი დისკომფორტისთვის.
