დავით როსტომაშვილზე თავდასხმის საქმეზე ერთ-ერთი ბრალდებული, ბექა კირვლიძე შიმშილობს და ის სამარტოო საკანში გადაიყვანეს. ამის შესახებ ინფორმაცია „ჯი-ეიჩ-ენს“ მისმა ადვოკატმა, ლოტბერდ კუპატაძემ განუცხადა.
„კირვალიძემ შიმშილობის დაწყებამდე, მთავარ პროკურატურას, სასამართლოს და უფლებადამცველ ორგანოებს მიმართა. როგორც ის აღნიშნავს, მისი საქმე არასწორადაა გამოძიებული. ის საქმის სწორად გამოძიებას ითხოვდა, წინააღმდეგ შემთხვევაში, ამბობდა, რომ მშრალ შიმშილობას დაიწყებდა.
კირვალიძეს გული აწუხებს, როგორც ის ამბობს, ციხის ექიმმა მისი დიაგნოზი სწორად არ დაწერა და სთხოვა ასეთ დასკვნაზე მოეწერა ხელი, რაზეც კირვალიძე შეეკამათა“, - აცხადებს კუპატაძე.
მისი განმარტებით, ამის შემდეგ კირვალიძე სამარტოო საკანში გადაიყვანეს.
როსტომაშვილზე თავდასხმის საქმეზე პროცესი დღეს თბილისის საქალაქო სასამართლოში 13:00 საათზეა ჩანიშნული. დღეს ბრალდების მხარის მოწმეების დაკითხვა და ნივთმტკიცებების გამოკვლევა იგეგმება.
შეგახსენებთ, რომ დავით როსტომაშვილზე თავდასხმის საქმეზე სამი პირია ბრალდებული - ბექა კირვალიძე, ზურაბ ქუთელია და არტემ აგაჯამოვი.
ბექა კირვალიძეს ბრალი წარდენილი აქვს 179-ე მუხლის მე-2 ნაწილის "ბ" და მე-3 ნაწილის "ა" ქვეპუნქტებით, 238-ე პრიმა მუხლის მეორე ნაწილით და 379-ე მუხლის პირველი ნაწილით, რაც ითვალისწინებს თავისუფლების აღკვეთას 8-დან 12 წლამდე. არტემ აგაჯანოვს ბრალი წარდგენილი აქვს 25-179-ე მუხლის მეორე ნაწილის "ბ" ქვეპუნქტით, რაც ითვალისწინებს 6-დან 9 წლამდე თავისუფლების აღკვეთას. ზურაბ ქუთელიას კი ბრალი წარდგენილი აქვა 179-ე მუხლის მეორე ნაწილის "ბ" ქვეპუნქტით, რაც ითვალისწინებს 6-დან 9 წლამდე თავისუფლების აღკვეთას.
