„ქურდულ სამყაროსთან“ დაკავშირებით მომზადებული ახალი საკანონმდებლო ცვლილებების თანახმად, „ქურდული სამყაროს” ცნება დანაშაულებრივი შეთანხმების მოდელზე დაყრდნობით ყალიბდება.
როგორც კანონპროექტის ავტორი - საქართველოს შინაგან საქმეთა სამინისტრო განმარტავს, შემოთავაზებული პროექტი შემუშავებულია ორგანიზებული დანაშაულის წინააღმდეგ ბრძოლის საუკეთესო საერთაშორისო პრაქტიკის საფუძველზე.
კანონის განმარტებით ბარათში აღნიშნულია, რომ „პირთა შეთანხმება „ქურდული სამყაროს“ საქმიანობის განხორციელებაზე საკმარისია, რათა პირთა ერთობა მიჩნეული იქნეს „ქურდულ სამყაროდ” და კონკრეტული დანაშაულებრივი ქმედების ჩადენა აუცილებელი არ არის. საკმარისია პირთა შეთანხმებული დანაშაულებრივი განზრახვის არსებობა მომავალში „ქურდული სამყაროს“ საქმიანობის განხორციელებისათვის.
იგივე წესი ეხება ბანდიტიზმსა და ტერორიზმსაც.
საკანონმდებლო პაკეტის ინიცირება 26 თებერვალს - ბიუროს გუშინდელ სხდომაზე მოხდა.
