„რუსიას ოჯახი სრულყოფილი გამოძიების ჩატარებას ითხოვს, რათა რეალური გარემოებები დადგინდეს, იარაღის პატრონი დაისაჯოს და ა.შ“, - განუცხადა „ჯი-ეიჩ-ენს“ მოკლული წვევამდელის, ბექა რუსიას ადვოკატმა, როლანდ შონიამ.
დღეს ზუგდიდის რაიონულმა სასამართლომ რუსიას მკვლელობაში ბრალდებულს 3 წლით თავისუფლების აღკვეთა მიუსაჯა. აღნიშნული გადაწყვეტილებით რუსიას ოჯახის წევრები უკმაყოფილოები არიან. ისინი თვლიან, რომ აღნიშნული სასჯელი ჩადენილი დანაშაულისთვის მცირეა და საქმეში სხვა პირების მონაწილეობაც იკვეთება.
„რუსიას ოჯახისთვის სასამართლოს გადაწყვეტილება დამაკმაყოფილებელი არ არის. მათ რა კითხვებიც აქამდე ჰქონდათ, იგივე კითხვები დარჩათ, არცერთი კითხვა არ გამორიცხულა“, - აცხადებს ადვოკატი.
შეგახსენებთ, რომ ბექა რუსია რამდენიმე თვის წინ, საგუშაგოზე მოკლეს. გამოძიების ინფორმაციით, მკვლელობაში მსჯავრდებულმა რუსიას ტაბელური იარაღიდან ესროლა.
