18-დან 22 თებერვლის ჩათვლით, საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში“ ორგანიზებით, 14 ქართული ექსპორტიორი კომპანია საკვები და სასმელი პროდუქციის წამყვან საერთაშორისო გამოფენაში „Gulfood 2018” მიიღებს მონაწილეობას და ქართულ ნაწარმს ფართო საზოგადოებას წარუდგენს.
GULFOOD 2018 არაბთა გაერთიანებულ საემიროების უმხსვილესი გამოფენაა, რომელიც ბოლო 20 წლის მანძილზე სასმელი და საკვები პროდუქციის ინდუსტრიაში მოღვაწე საერთაშორისო კომპანიებს აერთიანებს მსოფლიოს სხვადასხვა კუთხიდან. გამოფენას 185 ქვეყნიდან 97 000-ზე მეტი ვიზიტორი დაესწრება, ხოლო მონაწილე კომპანიების რაოდენობა 5 000-ს აღემატება.
ქართული სტენდის ქვეშ გამოფენაზე საკუთარ პროდუქციას წარმოადგენენ:შპს „ბარამბო“; შპს „მაუნთინ ფუდს“; შპს „გსქ კულა“; შპს „ხილარი“; შპს „ქართული აგრო სახლი“; შპს „აგროლეინი“; შპს „NUTSGE”; შპს „იუვის ბერის“; შპს „ჯორჯიან პროდაქტს რენესანს“; შპს „არომაპროდუქტი“; შპს „მანნა“; შპს „გემუანი“; შპს „Georgian Hazelnut Corporation” და საქართველოს მეცხვარეთა ასოციაცია. კომპანიები ფართო საზოგადოებას ქართული წარმოების მურაბებს, ჯემებს, სოუსებს, მოცვს, ჩაის, ხილისა და ბოსტნეულის წვენებს, , თხილს, ჩირს, სუბლიმირებულ ხილს, ტკბილეულს და ხორცპროდუქტს წარუდგენენ.
აღსანიშნავია, რომ სააგენტო „აწარმოე საქართველოში“ მსგავსი ტიპის ღონისძიებებს პერმანენტულად უწევს ორგანიზებას და აღნიშნული სახის გამოფენებში მონაწილეობით ხელს უწყობს ქართული პროდუქციის პოპულარიზაციას, ამასთანავე, სათანადო პლატფორმას ქმნის ახალი სავაჭრო პარტნიორების შეძენისა და კონტაქტების დამყარების კუთხით.
შეგახსენებთ, რომ ზემოთხსენებული შეხვედრა სააგენტოს „აწარმოე საქართველოში“ ექსპორტის მიმართულების ფარგლებში ხორციელდება, რომელიც მიზნად ისახავს საქართველოს საექსპორტო პოტენციალის პოპულარიზაციას, ქართული პროდუქტების კონკურენტუნარიანობის გაზრდას საერთაშორისო ბაზრებზე, ქართული პროდუქტების ექსპორტის მოცულობის ზრდას და საქართველოს საექსპორტო ბაზრების დივერსიფიცირებას.
