კომპანია „ბადაგონში“ განვითარებულ მოვლენებთან დაკავშირებით საქართველოს მწარმოებელთა ფედერაცია განცხადებას ავრცელებს, რომელსაც უცვლელად გთავაზობთ.
საქართველოს მწარმოებელთა ფედერაცია როგორც ქვეყანაში მოქმედი ერთ-ერთი მსხვილი გაერთიანება, რომელიც საკუთარ რიგებში აერთიანებს სხვადასხვა დარგების ასოციაციებს და კომპანიებს აღნიშნავს, რომ მიუხედავად იმისა რომ, კომპანია „ბადაგონი“, არ არის ჩვენი ფედერაციის წევრი, მნიშვნელოვნად მიგვაჩნია ის რომ, ნებისმიერი კომპანიის მიმართ განვითარებული პროცესები მიმდინარეობდეს გამჭვირვალედ და კანონის სრული დაცვით.
ცნობილია, რომ კომპანია "ბადაგონს” მოწინავე პოზიციები უკავია როგორც ადგილობრივ ღვინის ბაზარზე,ასევე ქართული ღვინის ერთ-ერთი მსხვილი ექსპორტიორი და ცნობადი ბრენდია საერთაშორისო ბაზრებზე, აქედან გამომდინარე კომპანიაში განვითარებულ პროცესებს ყურადღებით ვაკვირდებით, როგორც ჩვენ ადგილობრივი მწარმოებლები, ასევე ჩვენი ქვეყნის საერთაშორისო სავაჭრო პარტნიორები და პოტენციური ინვესტორები.
საქართველოს მწარმოებელთა ფედერაციას მიაჩნია, რომ უაღრესად მნიშვნელოვანია მაქსიმალურად გაიმიჯნოს კომპანია „ბადაგონის“ მუშაობის პროცესის უწყვეტობა და მდგრადობა, კომპანიის ირგვლივ მიმდინარე საგამომძიებლო საქმიანობისაგან რათა ხელი არ შეეშალოს კომპანიის როგორც ადგილობრივ ბაზარზე მუშაობას, ასევე არ გამოიწვიოს საერთაშორისო სავაჭრო პარტნიორებთან საექსპორტო ბაზრებზე პროდუქციის მიწოდების წყვეტა, შესაბამისად აღნიშნული არ გახდეს შემაფერხებელი სიგნალი, საქართველოსი როგორც სანდო სავაჭრო პარტნიორის, ასევე ინვესტორებისათვის საინვესტიციო გარემოს მიმზიდველობასა და მდგრადობასთან მიმართებაში, რომლითაც დღეს სამართლიანად ამაყობს ქვეყანა.
საქართველოს მწარმოებელთა ფედერაცია მიესალმება აღნიშნულ პროცესში საქართველოს ბიზნესომბუდმენის ბატონი ირაკლი ლექვინაძის ჩართვას, აგრეთვე საქართველოს ფინანსთა სამინისტროს საგამოძიებო სამსახურის მიერ გაკეთებულ განმარტებას, რომ საგამოძიებო სამსახურის საქმიანობა სრულად არის ორიენტირებული სახელმწიფოს, მოქალაქისა და ბიზნესის ინტერესის დაცვაზე.
საქართველოს მწარმოებელთა ფედერაცია კიდევ ერთხელ გამოვთქვამთ რწმენას, რომ კომპანია „ბადაგონის“ ირგვლივ მიმდინარე პროცესი არ იქნება შემაფერხებელი კომპანიის ბიზნესსაქმიანობისათვის”, აღნიშნულია განცხადებაში.
