სტამბოლის მესამე აეროპორტი ოფიციალურად 29 ოქტომბერს გაიხსნება. პროექტის მიმდინარეობის შესახებ ინფორმაცია თურქეთის ტრანსპორტისა და კავშირგამბულობის მინისტრმა ახმეტ არსლანმა საზოგადოებას გააცნო, რომელმაც განაცხადა, რომ ის მსოფლიოში ერთ-ერთი უმსხვილესი აეროპორტი იქნება და  ამ დროისათვის მისი მშენებლობა 80%-ით უკვე დასრულებულია.

„ახალი აეროპორტის მშენებლობა 80%-ით უკვე დასრულებულია. 29 ოქტომბერს ჩვენი პრეზიდენტის, პრემიერ-მინისტრისა და უამრავი სხვა სტუმრის თანდასწრებით ჩვენ მაქვს ექსპლუატაციაში გავუშვებთ. ათათურქის სახელობის საერთაშორისო აეროპორტიდან ავიარეისების გადმომისამართება 48 საათის განმავლობაში მოხდება“, განაცხადა არსლანმა.

როგორც მინისტრმა აღნიშნა, აეროპორტი 80 მლნ კვ/მ-ზე იქნება გადაჭიმული, სადაც მთლიანობაში 225 ათასი ადამიანი დასაქმდება. ხოლო მის უსაფრთხოებაზე 3500 მცველი და 6000 ვიდეო-კამერა იზრუნებს. აეროპორტს ერთდროულად 114 თვითმფრინავის მიღება შეეძლება. აეროპორტში განთავსებული სასტუმრო კი 450 ნომერზე იქნება გათვლილი.

სტამბოლის მესამე აეროპორტის მშენებლობაში 10,2 მლრდ დოლარის ინვესტიცია იქნება ჩადებული. მთავრობის გათვლებით კი ექსპლუატაციაში გაშვებიდან 25 წლის შემდეგ აეროპორტის მოგება 22,2 მლრდ დოლარი იქნება.

უკვე ცნობილია, რომ ახალი აეროპორტის გახსნის შემდეგ IATA-გან მინიჭებულ კოდს - IST-  ათათურქის  სახელობის საერთაშორისო აეროპორტი სწორედ ამ ახალ აეროპორტს დაუთმობს.

სტამბოლის ახალი აეროპორტს პირველ ეტაპზე დიდი ტერმინალი ექნება, რომელიც 1,4 მლნ კმ.მ-ზე იქნება გადაჭიმული. აეროპორტი წელიწადში 90 მლნ მგზავრის გატარებას შეძლებს.

სამომავლოდ აეროპორტს კიდევ 2 ტერმინალი და 3 ასაფრენ/დასაფრენი ბილიკი შეემატება, რაც აეროპორტს წელიწადში 200 მლნ მგზავრის გატარების საშუალებას მისცემს.

ტერმინალი, რომელიც მიმდინარე წელს ამოქმედდება იქნება ამ ტიპის მსოფლიოში ყველაზე დიდი შენობა და მასში განთავსდება:

რეგისტრაციისთვის განკუთვნილი 13 ლოკაცია 468 სარეგისტრაციო დახლით;

114 თვითმომსახურების ჯიხური;

51 თვითმომსახურების, ბარგის ჩასაბარებელი ჯიხური;

228 საპასპორტო საკონტროლო-გამშვები პუნქტი;

77 გასასვლელი;

Duty Free-ს ზონა რომელიც 55 ათას კვ/მ ზე იქნება გადაჭიმული;

42 კმ-იანი საბარგო სისტემა, რომელსაც საათში 28,9 ათასი ერთეული ბარგის გადამუშავება შეუძლია.

სტამბოლის ახალი აეროპორტი ქალაქიდან 35 კმ-ითაა დაშორებული და სტამბოლთან მეტროთი იქნება დაკავშირებული და ის 13 გაჩერებას გააერთიანებს. მეტროს ხაზის მშენებლობის პირველი ეტაპი 2018 წელს დაიწყება, ხოლო მეორე - 2021 წელს. 

მეტროს ახალი ხაზი მგზავრს საშუალებას მისცემს აეროპორტში 30 წუთში მოხვდეს.

აღსანიშნავია, რომ თურქეთის მთავრობამ სტამბოლის ათათურქის სახელობის საერთაშორისო აეროპორტის დახურვის გადაწყვეტილება მას შედეგ მიიღო, რაც დაინახა, რომ აეროპორტი გაზრდილი მგზავრთნაკადის გატარებას სრულფასოვნად ვეღარ ახდენდა და ინფრასტრუქტურა უფრო მეტად გაფართოების საშუალებასაც აღარ იძლეოდა.

გავრცელებული ინფორმაციით, სტამბოლის მესამე აეროპორტი რეჯეფ თაიფ ერდოღანის სახელობის იქნება, თუმცა ამ დრომდე ყველა ოფიციალურ დოკუმენტში მოხსენიებულია როგორც No3.