„ბათუმობის“ დღესასწაულის ჩატარების თარიღი შესაძლოა შეიცვალოს. ინიციატივა ბათუმის მერიას ეკუთვნის, თუმცა ქალაქის მერმა ლაშა კომახიძემ გადაწყვეტილება ერთპიროვნულად არ მიიღო და თემა საზოგადოების წინაშე სამსჯავროდ გამოიტანა. თუ როდის ჩატარდება „ბათუმობა“ სექტემბრის პირველ შაბათ-კვირას თუ 28 აპრილს, ეს გამოკითხვის საშუალებით გაირკვევა, რომელიც ბათუმის მერიის Facebook-ის გვერდზე უკვე დაიწყო და ერთი კვირის განმავლობაში გასტანს.
ბათუმის მერიაში განმარტავენ, რომ დღეისათვის ,,ბათუმობა" ყოველი სექტემბრის პირველ შაბათ-კვირას აღინიშნება. თარიღი დაკავშირებულია ბათუმში 1888 წლის 25 აგვისტოსა და 2 სექტემბერს ჩატარებულ ხმოსანთა პირველ არჩევნებთან.
„აღსანიშნავია, რომ 1885 წელს ბათუმის 90-მა მცხოვრებმა წერილობით მიმართა კავკასიის სამოქალაქო ნაწილის უფროსს ბათუმისათვის ქალაქის სტატუსის მინიჭების თაობაზე. 1888 წლის 28 აპრილს ბათუმს ქალაქის სტატუსი მიენიჭა.
გვსურს გავიგოთ მოსახლეობის აზრი ,,ბათუმობის“ დღესასწაულის ქალაქის სტატუსის მინიჭების დღეს აღნიშვნასთან დაკავშირებით.
,,ბათუმობის“ 28 აპრილს აღნიშვნა უფრო მეტ ხალისს შესძენს ამ დღესასწაულს, რადგან გაზაფხული სიცოცხლესთან, სიახლესთან და სინათლესთან ასოცირდება.
გამოხატეთ თქვენი აზრი ,,ბათუმობის“ აღნიშვნის თარიღის გადატანასთან დაკავშირებით”, აღნიშნულია ბათუმის მერიის მიერ გავრცელებულ განცხადებაში.
გამოკითხვაში მონაწილეობის მისაღებად, ეწვიეთ ბმულს: https://www.facebook.com/BatumiCityHallofficial/posts/1733653743361594
