ადვოკატი არ გამორიცხავს, რომ ყოფილი პროკურორის მილენა მითაიშვილის ყოფილი ძიძის სახლში მიმდინარე ჩხრეკა, მასზე ზეწოლას უკავშირდებოდეს.
„საგამოძიებო მოქმედებები მშვიდ გარემოში მიმდინარეობს. ალბათ, მათი ვარაუდით, გამოძიებისთვის ხელშესახებ რაღაცას ეძებენ“, - განუცხადა „ჯი-ეიჩ-ენს“ ყოფილი ძიძის, ნინო მჭედლიშვილის ადვოკატმა, გაგა მეშველიანმა.
ის ამ წუთებში ჭავჭავაძის 48 ნომერში, მჭედლიშვილის სახლში მიმდინარე ჩხრეკას ესწრება.
შეგახსენებთ, რომ პროკურორ მილენა მითაიშვილს ყოფილი ძიძები მუქარისთვის და დამამცირებელი მოპყრობისთვის უჩივიან.
ცნობისთვის, მითაიშვილმა პროკურორის თანამდებობა დატოვა. მისი თქმით, მიმდინარე გამოძიების გამო, საზოგადოებაში რომ არ დაისვას კითხვის ნიშნები გამოძიების ობიექტურობასთან დაკავშირებით და საზოგადოებაში პროკურატურის ობიექტურობის განცდა არ შეილახოს, მან საქართველოს მთავარ პროკურორს თანამდებობიდან გათავისუფლების თხოვნით მიმართა.
