თბილისის საქალაქო სასამართლომ პროკურატურის მოთხოვნა დააკმაყოფილა და 35-ე სკოლის მოსწავლეების დაჭრაში ბრალდებულს აღკვეთის ღიონისძების სახით პატიმრობა შეუფარდა. საქმის პროკურორის განცხადებით, წარდგენილი ბრალდება განსაკუთრებით მძიმე კატეგორიის დანაშაულს განეკუთვნება.
„სასამართლომ სრული მოცულობით გაითვალისწინა ბრალდების მხარის პოზიცია და აღკვეთის ღონისძიების სახით განუსაზღვრა პატიმრობა“, - განაცხადა პროკურორმა თეონა გვაზავამ.
შეგახსენებთ, რომ მიმდინარე წლის 31 იანვარს, თბილისში, ალ.ყაზბეგის გამზირზე, წითელი ბაღის ტერიტორიაზე, ურთიერთშელაპარაკებისას 2 მოზარდს ცივი იარაღით მუცლისა და გულმკერდის არეში ჭრილობა მიაყენეს, ერთ არასრულწლოვანს კი, ხელზე მსუქბუქი ჭრილობა აქვს. სამართალდამცველებმა ბრალდებული ცხელ კვალზე, თბილისში დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო.
თავდაპირველად გამოძიება ჯანმრთელობის განზრახ მძიმე დაზიანების ფაქტზე სსკ-ს 117-ე მუხლის მე-7 ნაწილით დაიწყო, თუმცა შემდეგ გადაკვალიფიცირდა და პოროკურატურა ბრალდებულს სსკ-ის კოდექსის 19-109 მუხლის მე-2 ნაწილის ბ და მე-3 ნაწილის ა ქვეპუნქტით ჩადენილ დანაშაულს ედავება, რაც გულისხმობს განზრახ მკვლელობის მცდელობას წინასწარი შეცნობით არასრულწლოვნებისა და ორი პირის მიმართ.
წარდგენილი ბრალდება განეკუთვნება განსაკუთრებით მძიმე კატეგორიის დანაშაულს და 16-დან 20 წლამდე თავისუფლების აღკვეთას ითვალისიწინებს.
