საქართველოს პრეზიდენტის მიხეილ სააკაშვილის განცხადებით, საქართველოში პოლიტიკური სპექტრის მარგინალიზირებულ ნაწილი ორგანიზებულ დანაშაულთან არის დაკავშირებული. პრეზიდენტის თქმით, ამის ნათელი მაგალითი ავსტრიის პოლიციის მიერ გამოქვეყნებული მასალებია, რომლის მიხედვითაც კრიმინალები თბილისში მიმდინარე საპროტესტო აქციებს აფინანსებდნენ, თუმცა მიხეილ სააკაშვილი დარწმუნებულია, რომ მაფია საქართველოში ფეხს ვერ მოიკიდებს. ამის შესახებ პრეზიდენტმა სასჯელაღსრულებისა და პრობაციის სამინისტროში გამართულ შეხვედრაზე ისაუბრა.
პრეზიდენტმა თბილისში შარშან გამართული საპროტესტო აქციები გაიხსენა და აღნიშნა, რომ ამ აქციების ესთეტიკა - საკნები, ქურდები, ქურდული ჟარგონები შემთხვევითი არ იყო.
"სამწუხაროდ არ არის დასამალი, რომ პოლიტიკური სპექტრის ერთი ნაწილი, მე ვლაპარაკობ მარგინალიზირებულ ნაწილზე, დაკავშირებულები არიან ორგანიზებულ დანაშულთან, ჩვენ ეს ვიცით. ავსტრიის პოლიციამ გამოქვეყნა დიდი სია, სადაც ნათლად არის ნაჩვენები, რომ თბილისში აქციებს ორგანიზებული დანაშაულებრივი ჯგუფი აფინასებდა, მათ შორის ავსტრიიდან, სხვა ევროპული ქვეყნებიდან და რუსეთიდან. ამიტომ, შემთხვეითი არ იყო ესთეტიკა ამ აქციების - საკნები, ქურდები, ქურდული ჟარგონები ტელევიზორში. საზოგადოების პატარა ნაწილი ამას აყვა და აიტაცა. ჩვენ ამას შევხვდით ცივსისხლიანად, რადგან საბოლოო ჯამში მე ვიცი, რომ კრიმინალები არიან მშიშრები და მათი დაფინასებული აქციები ჩაფლავდებოდა და საზოგადოებას ვერ მოახვევდა საკნების, ქურდების ლოგიკას", - განაცხადა პრეზიდენტმა.
მისივე თქმით, აღნიშნულ აქციებს, რომ ქართული მაფია საზღვარგარეთის ცენტრების დახმარებით აფინასებდა, ისიც ადასტურებს, რომ საერთაშორისო პრესა ამაზე წერდა.
"მე ვფიქრობ ვერდიქტი საზოგადოებამ ბოლო არჩევნებზე გამოუტანა და ასეც იქნება მომავალშიც", - აღნიშნა პრეზიდენტმა.
