საქართველოში მესიების ერა უნდა დამთავრდეს. ეს ის სიცოცხლეზე დიდი ფიგურებია, რომლებიც უდიდეს გავლენას ავრცელებენ იქნება ეს ოფიციალური თანამდებობიდან თუ კულისებს მიღმა დარჩენით, - ამბობს აშშ-ის ყოფილი ელჩი საქართველოში კენეტ იალოვიცი "ამერიკის ხმისთვის" მიცემულ ინტერვიუში. მისი თქმით, ეს თემა გამჭვირვალობას და დაბალანსებული პოლიტიკური სისტემის ქონას უკავშირდება.

„როცა საქართველოზე ვსაუბრობ, კარგია ხოლმე იმის გათვალისწინება, რომ ქვეყანას თვალს 1998 წელიდან ვადევნებ. სწორედ მაშინ დავინიშნე ამერიკის ელჩად. მოგეხსენებათ მაშინ სიტუაცია საკმაოდ მძიმე იყო. მას შემდეგ საქართველომ უდიდეს პროგრესს მიაღწია - გაიმართა რამდენიმე თავისუფალი და სამართლიანი არჩევნები. რა თქმა უნდა, არის კრიტიკაც, მაგრამ საერთო ჯამში, ისინი საერთაშორისო დამკვირვებლების მიერ დადებითად იქნა შეფასებული. ქვეყანას ჰყავს ფუნქციონირებადი პარლამენტი, მოქმედი პრეზიდენტი, პრემიერ მინისტრი... სააკაშვილის მთავრობიდან ქართული ოცნებისთვის ძალაუფლების გადაცემა ძალადობის გარეშე მოხდა. პრობლემები არის? კი. შეშფოთების მიზეზები? კი. მე ამ გამოწვევებს საბჭოთა გადმონაშთებად მოვიაზრებ. იმისთვის, რომ წარსულში გავლილი ცუდი გამოცდილება დაივიწყო დროა საჭირო. საქართველოს რაღაც ეტაპზე მოუწევს ამ პრობლემის გადალახვა. ქვეყანა ნატოსა და ევროკავშირის გზას ადგას და ამ გადმონაშთებისთვის თავის გართმევა აუცილებლად მოუწევს“, - ამბობს კენეტ იალოვიცი და განმარტავს რომ გადმონაშთებში ერთ-ერთ საკითხად ერთპარტიული მმართველობას გულისხმობს.

„რა თქმა უნდა, პარლამენტში არის აქტიური ოპოზიცია, მაგრამ კონტროლი სინამდვილეში მხოლოდ ერთ პარტიას აქვს. საქართველოში ვითარება ისე ცუდად არაა, რა თქმა უნდა, როგორც რუსეთში, ან რეალურად ავტორიტარულ ქვეყნებში, მაგრამ ერთპარტიული მმართველობა გარკვეულ რისკებს შეიცავს. ამ დროს ჩნდება განცდა, რომ არ არის კომპრომისზე წასვლის თუ დიალოგის გამართვის საჭიროება. ცოტა ხნის წინ ჩატარებულმა გამოკითხვამ აჩვენა, რომ მოსახლეობის ნაწილი უკმაყოფილოა მთავრობის გამჭვირვალობის ხარისხით, უკმაყოფილოა იმ სწრაფი ტემპით, რომლითაც საკონსტიტუციო ცვლილებები იქნა მიღებული. ეს ყველაფერი უნდა გამოსწორდეს.

მეორე საკითხი ის არის, რომ საქართველოში მესიების ერა უნდა დამთავრდეს. ეს ის სიცოცხლეზე დიდი ფიგურებია, რომლებიც უდიდეს გავლენას ავრცელებენ იქნება ეს ოფიციალური თანამდებობიდან თუ კულისებს მიღმა დარჩენით. ეს თემა გამჭვირვალობას და დაბალანსებული პოლიტიკური სისტემის ქონას უკავშირდება.

მესამე საკითხი ვფიქრობ, საპასუხისმგებლო თანამდებობებზე მეტი ქალის დანიშნვა და არჩევაა. დღეს ქალები არიან თანამდებობებზე, მაგრამ მათი რაოდენობა უნდა გაიზარდოს“, - ამბობს კენეტ იალოვიცი