რადიო “თავისუფლების” (RFE/RL) ქართული სამსახურის დირექტორი დავით კაკაბაძე სამსახურიდან გაათავისუფლეს.
დავით კაკაბაძის თქმით, მისი გათავისუფლების მთავარი მიზეზი "რუსთავი 2"-თან თანამშრომლობის საკითხი გახდა.
”უთანხმოების მთავარი მიზეზი "რუსთავი 2"-თან თანამშრომლობის საკითხი იყო, სხვა წვრილი მიზეზებიც დაასახელეს, მაგრამ რამაც დიდი კონფლიქტი წარმოშვა, ეს იყო ჩემი მხრიდან ამ საკითხზე გაწეული წინააღმდეგობა. ვუთხარი, რომ ჩემი დირექტორობის პირობებში ეს არ მოხდებოდა და ამის გაკეთება მაინც თუ გნებავთ, მაშინ გამათავისუფლეთ-მეთქი”, – განუცხადა კაკაბაძემ საზოგადოებრივ მაუწყებელს.
ცნობისთვის, BBG Watch-მა რადიო “თავისუფლების” სათავო ოფისის მენეჯმენტსა და ქართული სამსახურის ხელმძღვანელს დავით კაკაბაძეს შორის უთანხმოების შესახებ სტატია 23 იანვარს გამოაქვეყნა. გამოცემის ინფორმაციით, რადიო “თავისუფლების” სათაო ოფისი ქართულ ბიუროს "რუსთავი 2"-თან თანამშრომლობას აიძულებდა.
