ამერიკის ფინანსთა სამინისტროს მიერ გამოქვეყნებულ „კრემლის ანგარიშს“ რუსეთის პრეზიდენტი გამოეხმაურა.
„ეს რა თქმა უნდა, ერთმნიშვნელოვნად არამეგობრული აქტია, რომელიც ისედაც დაძაბულ რუსულ-ამერიკულ ურთიერთობებს კიდევ უფრო დაძაბავს. პასუხი მათ იმით უნდა გავცეთ, რომ პირველ რიგში, ჩვენს თავზე უნდა ვიფიქროთ, უნდა მივხედოთ ეკონომიკას, ჯანდაცვას, განათლებას, უნდა ავამაღლოთ ქვეყნის თავდაცვისუნარიანობა. ამის შემდეგ ისინი მიხვდებიან, რომ ამ ანგარიშებს, სიებს, დაშინებას და მუქარას აზრი არ აქვს. ჩვენ უნდა ვიმოქმედოთ ცნობილი პრინციპით: ძაღლი ყეფს, ქარავანი მიდის,“-აღნიშნა პუტინმა.
ამერიკის ფინანსთა სამინისტრომ კონგრესს ე.წ. „კრემლის ანგარიში“ გუშინ გადაუგზავნა. „შავ სიაში“ პუტინთან დაახლოვებული 210 პირი მოხვდა. მათ შორის 114 მაღალჩინოსანი და სახელმწიფო კომპანიის ხელმძღვანელი, 96 კი ოლიგარქია.
ანგარიშში რუსეთის მთავრობა თითქმის მთელი შემადგენლობით არის შეყვანილი. დოკუმენტში რუსეთის პრემიერ-მინისტრი დიმიტრი მედვედევი, საგარეო საქმეთა მინისტრი სერგეი ლავროვი და თავდაცვის მინისტრი სერგეი შოიგუ, ასევე სახელმწიფო დუმის სპიკერები, ფედერაციის საბჭოს წევრები და უშიშროების ფედერალური სამსახურის ხელმძღვანელები ფიგურირებენ. „შავ სიაში“ მოხვდნენ „როსნეფტის“ ხელმძღვანელი იგორ სეჩინი და „გაზპრომის“ დირექტორი ალექსეი მილერიც. ოლეგარქთა ჩამონათვალში კი რომან აბრამოვიჩი, ალიშერ უსმანოვი, ოლეგ დერიპასკა და სხვა ცნობილი მილიარდერები არიან.
