ავიაკომპანია AMS Airlines-ი ქართულ ავიაციაში არსებულ დარღვევებზე გავრცელებულ ინფორმაციას უარყოფს. როგორც AMS Airlines-ის ხელმძღვანელი მირიან სარიშვილი განმარტავს, გავრცელებული ინფორმაცია AMS Airlines-ი რეპუტაციის შელახვას ისახავს მიზნად.
„გვსურს გამოვეხმაუროთ რუსთავი 2-ის ეთერში, გადაცემა ,,P.S.“-ში გასულ სიუჟეტს საქართველოში რეგისტრირებული ავიაკომპანიების შესახებ, რომელშიც საუბარია ქართულ ავიაციაში არსებულ დარღვევებზე - პილოტების ზენორმირებულ მუშაობაზე, თვითმფრინავის ტექნიკური გაუმართაობის შემთხვევაში დოკუმენტაციის გაყალბებასა და კორუფციაზე. ავიაკომპანია AMS Airlines-ი სრული პასუხისმგებლობით აცხადებს, რომ რუსთავი 2-ის მიერ კომპანიასთან დაკავშირებით გავრცელებული ინფორმაცია არის მცდარი, არასწორი და არ ასახავს რეალობას.
იგი მიზნად ისახავს საზოგადოების შეცდომაში შეყვანასა და კომპანიის საქმიანი რეპუტაციის შებღალვას. 2015-2016 წლებში - პერიოდში, რომელიც ნახსენებია სიუჟეტში, ჩვენი კომპანია ახდენდა მხოლოდ ერთი ერთეული Airbus 300-ის ტიპის საჰაერო ხომალდის ექსპლუატაციას.
სიუჟეტში საუბარია სხვადასხვა კომპანიაში მსგავსი პრობლემის შესაძლო არსებობის შესახებ, მაგრამ განხილულია მხოლოდ ჩვენი კომპანია, რაც ბადებს ეჭვს გარკვეული ინტერესების არსებობის თაობაზე.
ჩვენი კომპანიის მიერ ფრენების განხორციელების შესახებ ინფორმაცია ყოველ 10 დღეში მიეწოდება სამოქალაქო ავიაციის სააგენტოს. სისტემატურად ხორციელდება მიწოდებული ინფორმაციის გადამოწმება და მონიტორინგი.
ასევე უნდა აღინიშნოს, რომ ტელეკომპანიის მიერ საკუთარ ვებგვერდზე სიუჟეტთან ერთად გავრცელებულ ინფორმაციაში საუბარია მხოლოდ ჩვენს კომპანიაზე, რაც კიდევ უფრო აძლიერებს გარკვეული ინტერესის არსებობის ეჭვს.
სიუჟეტის მომზადებისას ე.წ. ექსპერტების მიერ გაკეთებული უაპელაციო განცხადებები აშკარად მეტყველებს მათ არაპროფესიონალიზმზე და მიუთითებს მათ შეფარულ ინტერესებზე კონკრეტული პირების საწინააღმდეგოდ. ინტერვიუში, ჩვენი კომპანიის ხელმძღვანელის მიერ ხაზგასმით იქნა აღნიშნული, რომ წარმოდგენილი დოკუმენტების იდენტიფიცირება შეუძლებელია, ვინაიდან არ არის დატანილი არცერთი კომპანიის ლოგო, ხელმომწერი, პასუხისმგებელი პირის მონაცემები, ან თუნდაც, ვინ დაფრინავდა კონკრეტულ მარშრუტზე, და იყო თუ არა ამ მარშრუტზე ფრენისას რაიმე სახის დარღვევა. იდენტიფიცირების შეუძლებლობა და შესაბამისი მფრინავთა მონაცემების არარსებობა კი, იმთავითვე გამორიცხავს რაიმე სახის დარღვევაზე საუბრის შესაძლებლობას.
ავიაკომპანია AMS Airlines-ი აცხადებს სრულ მზადყოფნას, თუკი იქნება წარმოდგენილი რაიმე სახის დოკუმენტური, ან თუნდაც ისეთი მასალა, რომლის რეალური იდენტიფიცირება შესაძლებელი იქნება, დეტალურად გაიაროს ეს საკითხი ნებისმიერ პირთან, თუ სტრუქტურასთან და დაამტკიცოს საკუთარი სიმართლე», აცხადებს AMS Airlines-ი ხელმძღვანელი.
სამაუწყებლო ტელეკომპანია „რუსთავი 2“-ის გადაცემა „პოსტს სკრიპტუმის“ ინფორმაციით, ავიახომალდების გადაადგილების ჩანაწერების მიხედვით, ირკვევა, რომ რამდენიმე ქართული ავიაკომპანია, სავარაუდოდ, უხეშად არღვევს უსაფრთხოების ნორმებს და მფრინავებს ზოგჯერ შეუსვენებლად და ზენორმატიული დატვირთვით ამუშავებს. ეს კი რისკის ქვეშ აყენებს ამ საჰაერო ხომალდების უსაფრთხოებასაც და მთლიანად ქვეყნის ავიაციის ბედს.
„ერთ-ერთი პილოტის მიერ გამოგზავნილი ასობით ჩანაწერი, რომელიც 2015-16 წლების პერიოდს მოიცავს, HUB Georgia-ში გაანალიზეს, სადაც დაასკვნეს, რომ ქართული დროშით რეგისტრირებული ხომალდების არც ერთ დარღვევაზე მთავარ მაკონტროლებელ ორგანოს - სამოქალაქო ავიაციის სააგენტოს, რეაქცია არ ჰქონია.
როგორც ანონიმი წყარო ამტკიცებს, მან დარღვევების შესახებ 2017 წლის დეკემბერში თავადვე აცნობა სააგენტოს ხელმძღვანელს, თუმცა, პასუხი არ მიუღია.
სააგენტოს უფროსის, გურამ ჯალაღონიას, სახელი ბოლო თვეების განმავლობაში რამდენიმე ხმაურიან საქმეს დაუკავშირდა. მათ შორის, არსებობს ეჭვი, რომ უწყების მაღალჩინოსნები საქმიანი შეხვედრების ორგანიზებაში ინვესტორებისგან ფულს ითხოვდნენ.
დასახელებული ავიაკომპანიებიდან, სადაც სავარაუდო დარღვევები იკვეთება, ერთ-ერთი AMS Airlines-ია, რომელიც 4 სატრანსპორტო ეარბასს ამუშავებს.
წყაროს ინფორმაციით, დოკუმენტების წარმოება ორმაგად ხდებოდა - ერთი რეალური იყო, შიდა მოხმარებისთვის, რომ ზედმეტად ნამუშევარი საათები პილოტებისთვის აენაზღაურებინათ, ხოლო მეორე - შეცვლილი დოკუმენტი სააგენტოში მიდიოდა, რომ არავის ზედმეტი კითხვები არ გასჩენოდა.
ავიაკომპანიაში წარმოდგენილ მასალას არ ენდობიან და ამბობენ, რომ ყველა წესის დაცვით მუშაობენ და არც ერთ მფრინავს მათთან ზედმეტი საათი არ უმუშავია.
წყარო ამტკიცებს, რომ კონკრეტული მაღალჩინოსნები თბილისში, დუმილის სანაცვლოდ, ფულს იღებენ.
HUB Georgia-ს ინფორმაციით, სავარაუდო შუამავალი წარსულში ასევე სამოქალაქო ავიაციის სააგენტოს მაღალჩინოსანი იყო. არასამთავრობო ორგანიზაციაში თვლიან, რომ სახეზეა კორუფცია.
უახლოეს დღეებში სავარაუდო დარღვევების შესახებ შეგროვებული დოკუმენტაცია საქართველოს პროკურატურაში გადაიგზავნება“, აღნიშნულია ტელეკომპანიის მიერ გავრცელებულ სიუჟეტში.
