ქუთაისის №2 სამშობიაროს მთავარი ექიმი, ირაკლი მერკვილაძე ქუთაისის საქალაქო სასამართლომ ადამიანისთვის სიცოცხლის გაუფრთხილებლობით მოსპობის მუხლით ჩადენილ ქმედებაში დამნაშავედ ცნო და სასჯელის ზომად 2 წლით თავისუფლების აღკვეთა განუსაზღვრა.
ბრალდებული სასამართლო დარბაზშივე დააკავეს.
როგორც დაზარალებულმა ალა მატინოვამ imedinews-ს განუცხადა, ის ამ დღეს 5 წელი ელოდა, მას შემდეგ, რაც მისი 22 წლის შვილი მშობიარობის შემდეგ გარდაიცვალა. მისივე თქმით, გარდაცვალების მიზეზი ექიმის უყურადღებობა გახდა.
ექიმ ირაკლი მერკვილაძის ადვოკატი ალექსანდრე თათელიშვილი საქალაქო სასამართლოს გადაწყვეტილებას სააპელაციო სასამართლოში გაასაჩივრებს. მისი თქმით, საქმეში არ იყო წარმოდგენილი არცერთი მტკიცებულება, რომლის მიხედვითაც გამამტყუნებელი განაჩენი შეიძლებოდა დამდგარიყო.
დაკავებული ბრალს არ აღიარებს.
