„სასტუმროს თანამშრომლებსა და ადმინისტრაციის წარმომადგენლებს შორის შეხვედრა დღეს შედგა“, - განუცხადა „ჯი-ეიჩ-ენს“ სასტუმრო „ლეოგრანდის“ იურისტმა, კახა წერეთელმა.
იურისტის განმარტებით, ყველა თანამშრომელს შეუნარჩუნდება სამუშაო ადგილი.
„მათ დაუდასტურდათ პირობა, როგორც კი მუშაობის გაგრძელების საშუალება იქნება, თითოეული მათგანი თავის სამუშაო ადგილს დაუბრუნდება. სამსახური ყველას უნარჩუნდება, სამწუხაროდ, სასტუმროს უმუშევრობის გამო ხელფასების შენარჩუნება ვერ მოხერხდა. 2 თვის ხელფასი იქნა გაცემული, ამის შემდეგ, ხელფასების გაცემა შეუძლებელი გახდა“, - აცხადებს წერეთელი.
ადვოკატის განმარტებით, „ლეოგრანდის“ თანამშრომლები უფასო შვებულებაში დაახლოებით, ერთი კვირის წინ გავიდნენ. რაც შეეხება იმას, თუ როდის შეიძლება საგამოძიებო მოქმედებები დასრულდეს, ამაზე პასუხი წერეთელს არ აქვს.
„საგამოძიებო მოქმედებები როდის დასრულდება არ ვიცი, ამ ეტაპზე კვლავ გრძელდება შემთხვის ადგილზე მუშაობა. პირველი ნაბიჯი სწორედ ესაა - საგამოძიებო მოქმედებების დასრულება, შემდეგია, მოწესრიგება, შემდეგ თუკი, უსაფრთხოების საკითხში რამე პრობლემა აღმოჩნდება, ამ პრობლემის აღმოფხვრა და ა.შ. ამ ყველაფერს რა დრო დაჭირდება, ვერავინ იტყვის“, - აღნიშნავს კახა წერეთელი.
შეგახსენებთ, სასტუმრო ”ლეოგრანდში” 2017 წლის 25 ნოემბერს გაჩენილი ხანძრის შედეგად 11 ადამიანი დაიღუპა და 20 დაშავდა.
