„კიდევ ერთხელ დადგინდა, რომ ვიდრე შეზღუდვა განხორციელდებოდა, ბექა ხახუბიას მიმართ არაერთი, სხვადასხვა ფორმის ბარიერი გამოიყენეს, რათა ის შეჩერებულიყო“, - განაცხადა „ჯი-ეიჩ-ენთან“ ხახუბიას დაღუპვის საქმეში ბრალდებული პოლიციელების ადვოკატმა, ნოდარ ცინცაძემ.
დღეს გამართულ სასამართლო პროცესზე ბრალდების მხარის მიერ წარმოდგენილი ვიდეომტკიცებულებების განხილვა მიმდინარეობდა.
„საპატრულო პოლიციის ეკიპაჟების სამხრე კამერების და ავტომანქანის ვიდეორეგისტრატორის ჩანაწერები გამოვიკვლიეთ... ვიდეომასალიდან ჩანს, რომ ხახუბია ამ შეზღუდვებს და ბარიერებს არ დაემორჩილა, ასევე არ დაემორჩილა მოწოდებებს, რომ ავტომანქანა შეეჩერებინა. მან კვლავ დიდი სისწრაფით გააგრძელა მოძრაობა და დაუმორჩილებლობა“, - აცხადებს ცინცაძე.
შემდეგი სასამართლო პროცესი 2 თებერვალს ჩაინიშნა.
შეგახსენებთ, რომ 17 მაისს, გორთან მომხდარი ავტოსატრანსპორტო შემთხვევის შედეგად, პარლამენტის წევრის, ფოთის მაჟორიტარი დეპუტატის, ირაკლი ხახუბიას შვილი, 21 წლის ბექა ხახუბია დაიღუპა.
ოჯახის განცხადებით, ახალგაზრდა საპატრულო პოლიციის თანამშრომლების უკანონო ქმედებას ემსხვერპლა. გორის გვირაბის გასასვლელში, სამართალდამცავებმა გზა სატვირთო ავტომანქანით ჩახერგეს, რა დროსაც, დიდი სისწრაფით მოძრავმა ბექა ხახუბიამ, რომელიც უკვე განათებული გვირაბიდან სიბნელეში გამოდიოდა, ტრაილერი ვერ შენიშნა და მაქსიმალური სიჩქარით შეეჯახა მას, რა დროსაც დაიღუპა.
ბექა ხახუბიას ავარიის საქმეზე ბრალი 3 პოლიციელს – ნუკრი ხაბელაშვილს, გიორგი სადაღაშვილს და ზურაბ რუსიშვილს წარუდგინეს. სასამართლომ სამივე მათგანი 1000 ლარიანი გირაოს სანაცვლოდ გაათავისუფლა. ბრალდებულებმა მათ მიმართ სისხლის სამართლის საქმის შეწყვეტა მოითხოვეს, თუმცა, აღნიშნული შუამდგომლობა მოსამართლემ არ დააკმაყოფილა და საქმის არსებითი განხილვა ამ დრომდე გრძელდება.
