დღეს, საქალაქო სასამართლოში ხორავას ქუჩაზე მომხდარი ტრაგედიის არსებითი განხილვა იწყება. როგორც დაზარალებული, ასევე ბრალდებულის დაცვის მხარე არასრულყოფილ გამოძიებაზე საუბრობს და სასამართლო განხილვისგან გამოძიების მიერ შეთავაზებული ვერსიის სრულ ცვლილებას ვარაუდობენ.
დოკუმენტი, რომელსაც გრიფი "საიდუმლო" ადევს რუსთავი 2– ის გადაცემა ,,პოსტსკრიპტუმს“ ჩაუვარდა ხელში.
ეს არის საბრალდებო დასკვნა, რომელიც სკოლის ორი მოსწავლის მკვლელობის საქმეს ეხება და მასში დეტალურად არის აღწერილი პროკურატურის ვერსია – რა მოხდა პირველ დეკემბერს.
დოკუმენტში მოცემულია კონკრეტული სახელები და გვარები - ვინ როდის სად იმყოფებოდა და რას აკეთებდა დაპირისპირების და მკვლელობის მომენტში. მასში უამრავი მოზარდის სახელი და გვარია დასახელებული. ვინ ვის დაემუქრა, ვინ ვის იარაღი მიუშვირა, ვინ ითხოვა დახმარება, როგორ დაითქვა შეხვედრა და ა.შ. საერთო ჯამში, გარჩევაში 25-მდე ბავშვი მონაწილეობდა, მაგრამ აქედან ნახევარი იდენტიფიცირებული არ არის. ისინი გამოძიებას მხოლოდ ასე – ,,და სხვები“ – ყავს მოხსენიებული.
მოკლული სარალიძის მამა ამბობს, რომ რეალური ფაქტები სრულიად სხვაგვარი იყო. ზაზა სარალიძე გამორიცხავს, რომ მის შვილს 12-ჯერ დანა მხოლოდ ერთმა არასრულწლოვანმა დაარტყა. ,,თუ ერთმა მიაყენა 12 ჭრილობა ჩემს შვილს, რას აკეთებდა დანარჩენი 25 ამ დროს“ – კითხულობს ზაზა სარალიძე. ბრალის დადგენილებას არც ბრალდებულის დაცვის მხარე ეთანხმება. გამოძიება არაფერს ამბობს დაჭრილ ორ მოზარდზე, ვინ არიან ისინი ან რა ვითარებაში დაიჭრნენ.
დოკუმენტი, რომელიც პოსტ სკრიპტუმმა მოიპოვა, მკვლელობიდან 14 დღის შემდეგ არის დაწერილი. ცნობილია, რომ მას შემდეგ პროკურატურამ მკვლელობაში ბრალდებულ მოზარდებს ბრალი ორჯერ დაუმძიმა.
