თბილისის სააპელაციო სასამართლოში, ამ წუთებში, ერთი სამართალდამცველისა და კლუბ "ბასიანის" დაცვის ორი წევრის დაჭრაში ბრალდებულ თამაზ ქვლივიძის სასამართლო პროცესი მიმდინარეობს.
პროცესზე დაცვის მხარემ, გუშინ, 16 იანვარს, მედიით გაკეთებული საჯარო განცახადებები წაიკითხა. მათ მიაჩნიათ რომ თამარ ჩუგოშვილისა და ნათია მეზვრიშვილის კომენტარები უპასუხისმგებლოა და მოსამართლეზე ზეწოლის მცდელობაა.
"მან ნებაყოფლობით ჩააბარა ყველა ბიოლოგიური ნიმუში, რაც გამომძიებელმა მოითხოვა, არც ამოცნობაზე განუცხადებია უარი. ეს თანამშრომლობა არ არის? ბრალდებული მიიმალებაო, ამ დროს ის გამოცხადდა პროცესზე, რისი შიშით უნდა მიიმალოს? ხომ გამოცხადდა? მოსალოდნელი მკაცრი სასჯელის შიშით მიიმალოს, ჰიპოთეტურია. ბრალდებული დადებითად ხასიათდება. საველიევი დაზარალებულად ცნობილი არ არის, ანუ მიაჩნიათ, რომ მის მიმართ დანაშაულს არ ჰქონია ადგილი. თუ პოლიციელის მიმართ განხორციელდა თავდასხმა და მინისტრის მოადგილე ამბობს, კაცს გვიკლავდნენო, რატომ არ აქვს ამ ადამიანს ბრალი წაყენებული. საველიევი დაჭრილი რომ არის, გაქვთ ამის დამადასტურებელი სამედიცინო დოკუმენტაცია? მას პოლიციის ფორმა ეცვა? პოლიციელი რომ იყო შეიძლებოდა ბრალდებულს სცოდნოდა?არცერთი მოწმე არ ამბობს რომ მას ფორმა ეცვა”, - განაცხადა დაცვის მხარემ.
შეგახსენებთ, თბილისის საქალაქო სასამართლომ თამაზ ქვლივიძე გირაოს სანაცვლოდ გაათავისუფლა.
მთავარმა პროკურატურამ ბრალდებულისთვის აღკვეთის ღონისძიების სახით პატიმრობა მოითხოვა, თუმცა, სასამართლო პროცესზე, ბრალდებულს აღკვეთის ღონისძიების სახით 30 000 ლარის ოდენობით გირაო შეეფარდა.
აღნიშნული პროკურატურამ სააპელაციო სასამართლოში გაასაჩივრა.
