კიევი არ არის წინააღმდეგი ყირიმში დატოვებული ტექნიკა დაიბრუნოს, თუმცა ეს საკითხი დეტალურ შესწავლას საჭიროებს. ასე აფასებს კრემლის ლიდერის მიერ რუსული მედიის წარმომადგენლებთან შეხვედრისას გაკეთებულ განცხადებას უკრაინული მხარე. უკრაინის სამხედრო-საზღვაო ძალების მეთაურის, იგორ ვორონჩენკოს თქმით, საბოლოო გადაწყვეტილება უკრაინის ხელისუფლებამ უნდა მიიღოს.
„ქვეყნის უმაღლეს პოლიტიკურ მმართველობას კარგად დაფიქრება მართებს, რათა კრემლის ბინძური თამაშების მონაწილე არ გახდეს. რაც შეეხება რუსეთის პრეზიდენტის განცხადებას იმის შესახებ, რომ ყირიმში დატოვებული უკრაინული ტექნიკა საცოდავ მდგომარეობაში იყო, ეს სიმართლეს არ შეესაბამება. ყირიმში გვყავდა 8 საბრძოლო გემი. მათგან 6 გამართული იყო, 2-ს კი რემონტი უტარდებოდა,“-აღნიშნა ვორონჩენკომ.
გუშინ რუსული მედიასაშუალებების რედაქტორებთან საუბრისას პუტინმა განაცხადა, რომ რუსეთი მზადაა უკრაინას ყირიმში დატოვებული სამხედრო ტექნიკა დაუბრუნოს.
