ამ დრომდე არ არის ცნობილი გაასაჩივრებს თუ არა, საქართველოს ყოფილი პრეზიდენტი, მიხეილ სააკაშვილი თბილისის საქალაქო სასამართლოს მიერ მის მიმართ გამოტანილ გამამტყუნებელ განაჩენს.
როგორც „ჯი-ეიჩ-ენს“ სააკაშვილის საზოგადოებრივმა ადვოკატმა, სოფიო გოგლიჩიძემ განუცხადა, მისი დაცვისქვეშ მყოფის მხრიდან მასთან კომუნიკაციის მცდელობა არ ყოფილა. აქედან გამომდინარე, მისთვის უცნობია აღნიშნულთან დაკავშირებით, სააკაშვილის პოზიცია.
ადვოკატს განაჩენის გამოცხადებამდე, ყოფილი პრეზიდენტის ოჯახთან დაკავშირების მცდელობა ჰქონდა, თუმცა, მათ შორის კომუნიკაცია ვერ შედგა.
შეგახსენებთ, რომ მოსამართლე გიორგი არევაძემ მიხეილ სააკაშვილის საქმეზე გადაწყვეტილება 5 იანვარს გამოაცხადა. არევაძემ ის დამნაშავედ მიიჩნია და 3 წლის ვადით თავისუფლების აღკვეთა მიუსაჯა.
დაცვის მხარემ აღნიშნული გადაწყვეტილება განაჩენის გამოტანიდან ერთი თვის ვადაში უნდა გაასაჩივროს.
ცნობისთვის, მიხეილ სააკაშვილს სახელმწიფო ბრალდება სანდრო გირგვლიანის მკვლელობის საქმეში უფლებამოსილების ბოროტად გამოყენებას ედავებოდა.
აღნიშნულ საქმეზე სასამართლო პროცესები თითქმის, 5 წლის განმავლობაში მიმდინარეობდა.
