სასჯელის ახალი სახით - შინაპატიმრობით, ამ დრომდე არცერთ პატიმარს არ უსარგებლია. ამის შესახებ „ჯი-ეიჩ-ენს“ თბილისის საქალაქო სასამართლოში განუცხადეს.
„თბილისის საქალაქო სასამართლოში არსებული მონაცემებით, 2018 წლის პირველი იანვრიდან დღემდე მსჯავრდებულზე სასჯელის სახით შინაპატიმრობა გამოყენებული არ ყოფილა“, - აცხადებენ სასამართლოში.
შეგახსენებთ, რომ სასჯელის ახალი სახე - შინაპატიმრობა ძალაში პირველი იანვრიდან შევიდა. აღნიშნული საკანონმდებლო ცვლილებათა პაკეტი სასჯელაღსრულებისა და პრობაციის სამინისტრომ მოამზადა, რომელიც პარლამენტმა სამი მოსმენით დაამტკიცა.
ცნობისთვის, სასჯელის ახალი სახე - შინაპატიმრობა სრულწლოვან მსჯავრდებულებზეც გავრცელდება. ამ დრომდე აღნიშნული სასჯელის სახე მხოლოდ არასრულწლოვანთა მიმართ გამოიყენებოდა.
სასჯელაღსრულებისა და პრობაციის სამინისტროს ცნობით, შინაპატიმრობა არასაპატიმრო სასჯელის სახეა და მსჯავრდებულისთვის დღე-ღამის განსაზღვრულ პერიოდში თავის საცხოვრებელ ადგილზე ყოფნის ვალდებულებას ითვალისწინებს.
შინაპატიმრობა, მოსამართლის მიერ შესაძლოა, დაენიშნოს ნასამართლობის არმქონე პირს ექვსი თვიდან ორ წლამდე ვადით; შინაპატიმრობა შეიძლება დაინიშნოს როგორც ძირითად, ისე დამატებით სასჯელად; პენიტენციურ დაწესებულებაში მყოფ მსჯავრდებულს კი, სასჯელი შინაპატიმრობით შეიძლება შეუცვალოს სასჯელაღსრულებისა და პრობაციის სამინისტროს ადგილობრივმა საბჭომ.
სასჯელაღსრულებისა და პრობაციის სამინისტროს ცნობით, შინაპატიმრობა, როგორც წესი, ელექტრონული ზედამხედველობის საშუალებების გამოყენებით აღსრულდება სასჯელაღსრულებისა და პრობაციის სამინისტროს სსიპ არასაპატიმრო სასჯელთა აღსრულებისა და პრობაციის ეროვნული სააგენტოს მიერ.
პრობაციის ეროვნულ სააგენტოში ფუნქციონირებს თანამედროვე ტექნიკით აღჭურვილი მონიტორინგის ცენტრი. პირს, რომელსაც სასჯელის სახედ შინაპატიმრობა აქვს განსაზღვრული, როგორც წესი, ფეხზესპეციალური სამაჯური უმაგრდება, რომელიც ელექტრონულად დაკავშირებულია მონიტორინგის ცენტრთან. განსაზღვრული დღის განრიგის, პერიმეტრის დარღვევის ან სამაჯურის დაზიანების შემთხვევაში, სიგნალიელექტრონული მონიტორინგის ცენტრს გადაეცემა. სწორედ ამის შემდეგ იწყება შესაბამისი რეაგირება დარღვევაზე.
შინაპატიმრობა არ დაენიშნება გაწვეულ სამხედრო მოსამსახურესა და ოჯახური დანაშაულის ჩამდენ პირს. შინაპატიმრობის მოხდის პერიოდში, მსჯავრდებულს საქართველოს საზღვრის გადაკვეთა ეკრძალება.
