„ცოლად მოყვანის მიზნით, გოგონას გატაცება მოხდა. აღნიშნულთან დაკავშირებით საქმე სისხლის სამართლის კოდექსის 143-ე მუხლითაა აღძრული, რაც თავისუფლების უკანონოდ აღკვეთას გულისხმობს. ამ ეტაპზე საგამოძიებო ღონისძიებები მიმდინარეობს. ჩანიშნულია შესაბამისი ექსპერტიზები“, - განუცხადეს „ჯი-ეიჩ-ენს“ შინაგან საქმეთა სამინისტროში.
ინფორმაციას, რომ 18 წლის ეთნიკურად აზერბაიჯანელი გოგონა დედის თანდასწრებით 5 მამაკაცმა გააუპატიურა, ძალოვანი უწყება კატეგორიულად უარყოფს.
თუმცა, „ჯი-ეიჩ-ენს“ ინგოროყვას კლინიკაში დაუდასტურეს რომ 9 იანვარს ნამდვილად შეიყვანეს გოგონა, რომელსაც რბილი ქსოვილის დაბეჟილობები აღენიშნებოდა.
"ინგოროყვას კლინიკაში გუშინ, საღამოს საათებში მარნეულიდან შემოიყვანეს გოგონა, მას აღენიშნებოდა რბილი ქსოვილების დაბეჟილობები. პაციენტი გუშინვე გავწერეთ, გაწერისას მისი მდგომარეობა სტაბილური იყო, დაენიშნა ექსპერტიზა, რომელიც სამხარაულის ექსპერტიზის ბიუროში უნდა ჩაუტარდეს",- განუცხადა "ჯი-ეიჩ-ენს" კლინიკის დირექტორმა, კოტე მუმლაძემ.
