"სასამართლომ მიიჩნია, რომ ორივე მხარის მტკიცებულებები უნდა ყოფილიყო დასაშვები, რადგან ჩათვალა, რომ ამ ეტაპზე საწინააღმდეგოს საფუძველი არ იყო", - ამის შესახებ ხორავას ქუჩაზე, მოზარდებს შორის სისხლიანი გარჩევისას, ორი არასრულწლოვნის მკვლელობაში ერთ-ერთი ბრალდებული არასრულწლოვანის ადვოკატმა, ტარიელ კაკაბაძემ ჟურნალისტებს, პროცესის დასრულების შემდეგ განუცხადა.
უფლებადამცველის განმარტებით, დაცვის მხარეს ბევრ მტკიცებულებასთან დაკავშირებით აქვს პრეტენზია და მიაჩნიათ, რომ ისინი კანონის არსებითი დარღვევით არის მოპოვებული.
"ამაზე დღევანდელ სასამართლო სხდომაზე შეგნებულად არ გავამახვილეთ ყურადღება, სასამართლომ მიიჩნია, რომ აღნიშნული საკითხი უნდა შეფასებულიყო არსებითი განხილვის ეტაპზე. ჩვენთვის მთავარი არ არის, რომელ სხდომაზე შეფასდება მტკიცებულებები, მთავარია სასამართლომ ჭეშმარიტება დაინახოს", - განაცხადა ადვოკატმა.
თბილისის საქალაქო სასამართლოში არასრულწლოვანთა მკვლელობაში ბრალდებული არასრულწლოვნების სასამართლო პროცესი რამდენიმე წუთის წინ დასრულდა.
საქმის არსებითი განხილვა 22 იანვარს 11 საათზე დაინიშნა.