"ჩემი დაცვის ქვეშ მყოფის სახელთან და გვართან დაკავშირებით ვერაფერს გეტყვით“, - ამის შესახებ ტერორიზმის მხარდაჭერის ბრალდებით დაკავებული შოაიფ ბორზიევის ადვოკატმა იმედა ქარქაშაძემ მას შემდეგ განაცხადა, რაც პროკურორმა, ნანა ხუნჯუამ აღნიშნა, რომ თბილისში, 22 ნოემბერს, ბერი გაბრიელ სალოსის გამზირზე, სპეცოპერაციისას დაკავებული შოაიფ ბორზიევი საბოლოოდ იდენტიფიცირებული არ არის და ის საქმეში საედი დუდაევის სახელით ფიგურირებს.
„აქამდეც ვაცხადებდი და ახლაც გეტყვით, რომ სანამ ჩემი დაცვის ქვეშ მყოფთან არ შევთანხმდები, მის სახელთან და გვართან დაკავშირებით ვერაფერს გეტყვით. ყველა მასალის გაცნობის და მასთან საუბრის შემდეგ, სავარაუდოდ, გადავწყვეტთ ყველაფერს“, - განუცხადა ჟურნალისტებს ტერორიზმის მხარდაჭერის ბრალდებით დაკავებული შოაიფ ბორზიევის ადვოკატმა იმედა ქარქაშაძემ.
შეგახსენებთ, რომ სპეცოპერაციის შედეგად დაკავებული ორი პირი, ზურაბ გორნაკაშვილი და შოაიფ ბორზიევი დღეს თბილისის საქალაქო სასამართლომ პატიმრობაში დატოვა. ბორზიევის ადვოკატმა აღკვეთის ღონისძიების სახით შეფარდებული პატიმრობის გაუქმება, გორნაკაშვილის ადვოკატმა კი გირაოს სანაცვლოდ, აღკვეთის ღონისძიების-პატიმრობის შეცვლა მოითხოვა, თუმცა მოსამართლემ მათი შუამდგომლობა არ დააკმაყოფილა.