„ვესაუბრე, დუმილის უფლებას იყენებს, თავს დამნაშავედ არ თვლის და არც რაიმე სახის კომენტარის გაკეთება სურს მანამდე, სანამ საქმეს არ გავეცნობი. ის გუშინ დააკავეს, ბრალს ალბათ, დღეს წაუყენებენ, გამომძიებელს უნდა დავურეკო, გავესაუბრო“, - განუცხადა „ჯი-ეიჩ-ენს“ ზურაბ იდოიძის ადვოკატმა, დათუნა მოდებაძემ.
მან სუს-ის შენობა ნახევარი საათის წინ დატოვა, სადაც მისი დაცვის ქვეშ მყოფს შეხვდა. თუ რაზე ისაუბრა მასთან, ადვოკატი არ აკონკრეტებს.
შეგახსენებთ, რომ ზურაბ იდოიძე გუშინ, ახმეტაში დააკავეს. სოფელ ომალოში მის კუთვნილ სახლში ჩატარდა ჩხრეკა.
როგორც სუს-ის მიერ გავრცელებუო ინფორმაციაშია ნათქვამი, გამოძიების ამ ეტაპზე დადგენილია, რომ დაკავებული ზურაბ იდოიძე, ზურაბ გორნაკაშვილთან ერთად ჩავიდა თურქეთის ქალაქ ხოფაში ახმედ ჩატაევის და მისი დაჯგუფების წევრების დასახმარებლად. დაკავებულმა, ზურაბ გორნაკაშვილთან ერთად ახმედ ჩატაევი და მისი დაჯგუფების წევრები ხოფაში, მათი დროებითი საცხოვრებელი ბინიდან მანქანით მიიყვანა თურქეთ-საქართველოს საზღვართან, კირნათი-მარადიდის მწვანე ზოლის მონაკვეთამდე.
გამოძიება საქართველოს სსკ-ის 331-ე პრიმა მუხლის მესამე ნაწილით მიმდინარეობს, რაც ტერორიზმის დაფინანსებას , ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს, რამაც მძიმე შედეგი გამოიწვია. სასჯელის ზომად 17-დან 20 წლამდე ვადით ან უვადო თავისუფლების აღკვეთას ითვალისწინებს“, - ნათქვამია განცხადებაში.
