თბილისის მერიის ყოფილი თანამშრომლის ოთარ აბესაძის აღკვეთის ღონისძიების – პატიმრობის გირაოთი შეცვლის თაობაზე ხელმოწერები გროვდება. წერილს საპარლამენტო უმრავლესობის დეპუტატთა ნაწილი აწერს ხელს. მათ შორის, ერთ-ერთი ხელმომწერი ნუკრი ქანთარიაა.
,,მისი სავალალო ჯანმრთელობის მდგომარეობის შესახებ საჯაროდ ვრცელდება ინფორმაცია. ის მძიმე შეცდომა, რომელიც დანაშაულში გადაიზარდა, რაც მას მოუვიდა, რამდენადაც ჩემთვის ცნობილია, გაცნობიერებული აქვს თავიდან ბოლომდე, აღიარებს და არ მგონია, მისი სიცოცხლე ამ დანაშაულს უნდა გადაყვეს. ამიტომ, მე, როგორც მოქალაქე, როგორც ადამიანი, ადამიანურად ჩემ პოზიციას ვაფიქსირებ“, – განაცხადა ნუკრი ქანთარიამ.
საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, ქრთამის აღების ფაქტზე, თბილისის მუნიციპალიტეტის მერიის თანამშრომელი - ოთარ აბესაძე 12 ივლისს დააკავეს.
ოთარ აბესაძე "ქართული ოცნების" ახალგაზრდულ ორგანიზაციას ხელმძღვანელობდა, შემდეგ კი, საქართველოს განათლებისა და მეცნიერების მინისტრის მრჩეველი იყო.
