სასტუმრო „ლეოგრანდში“ გაჩენილი ხანძრის შედეგად დაღუპულების ოჯახის წვერებთან მოლაპარაკება კომპენასაციის გაცემასთან დაკავშირებით, გუშინ დასრულდა. მოლაპარაკებას 10 ოჯახთან აწარმოებდნენ, მათთან ხელშეკრულებებიც გაფორმდა.
კომპენსაციაზე მოლაპარაკება ჯერ არ დასრულებულა იმ გარდაცვლილის ოჯახთან, რომელიც ირანის მოქალაქე იყო.
არსებული ინფრომაციით, თითოეული ოჯახი 50 000 დოლარს მიიღებს. აღნიშნული თანხის გარდა, სასტუმროს მენეჯმენტი გარდაცვლილების ბავშვების განათლებისა და დასაქმების ვალდებულებასაც იღებს.
დადგება თუ არა ვინმეს პასუხისმგებლობის საკითხი, ეს ექპერტიზის დასკვნაზეა დამოკიდებული. შენობას ამ დრომდე სამართალდამცველები იცავენ, საქმეზე არაერთი პირი დაიკითხა, მათ შორის სასტუმროს მფლობელიც.
შეგახსენებთ, რომ ბათუმში, სასტუმრო „ლეოგრანდში“ ხანძარი 24 ნოემბერს, დაახლოებით 20:00 საათზე გაჩნდა. ხანძრის შედეგად დაიღუპა 11 ადამიანი, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის.
მომხდარ ფაქტთან დაკავშირებით, გამოძიება სახანძრო უსაფრთხოების წესის დარღვევის მუხლით მიმდინარეობს.
