ქრთამის აღების ბრალებით დაკავებული მერიის ყოფილი მაღალჩინოსნის, ოთარ აბესაძის გასათავისუფლებლად ხელმოწერების შეგროვება დაიწყო. ამ დროისთვის პეტიციას ხელს 300-მდე ადამიანი აწერს.
აბესაძეს მხარდაჭერა პოლიტიკოსებმა და საზოგადოებაში ცნობილმა ადამიანებმა გამოუცხადეს. ერთ-ერთი პირველი, ვინც აბესაძის მდგომარეობასთან დაკავშირებით წუხილი გამოთქვა, ოთარ ჩრდილელი იყო. ის საჯარო მიმართვაში აბესაძის მძიმე ფიზიკურ და სულიერ მდგომარეობაზე საუბრობდა.
აბესაძეს თანადგომა დეპუტატმა, ნუკრი ქანთარიამაც გამოუცხადა. ქანთარიას თქმის, ის მზად არის, ბრალდებულს თავდებშიც კი ჩაუდგეს.
აბესაძის გათავისუფლების მომხრეები არიან ასევე ზაქარია ქუცნაშვილი, დაჩი ცაგურია, ირაკლი ჭეიშვილი და ა.შ.
ოთარ აბესაძე რამდენიმე დღის წინ, სასჯელაღსრულების დაწესებულებიდან ჩაფიძის კლინიკაში გადაიყვანეს. მან ჯერ სასამართლოზე დაკარგა გონება, მოგვიანებით კი, საპყრობილეში გახდა შეუძლოდ. მიუხედავად დაცვის მხარის მტკიცებისა, რომ მისი ჯანმრთელობის მდგომარეობა მძიმეა, სასამართლომ აბესაძე პატიმრობაში დატოვა.
შეგახსენებთ, რომ ოთარ აბესაძე მიმდინარე წლის 12 ივნისს, ქრთამის აღების ბრალდებით დააკავეს.
