პანკისის სპეცოპერაციისას ტერორიზმის მხადრაჭერის ბრალდებით დაკავებულ რუსლან ალდამოვს მისი უფლებადამცველი, მარიამ კუბლაშვილი დღეს, 15:00 საათზე საპყრობილეში მოინახულებს. ამის შესახებ „ჯი-ეიჩ-ენს“ კუბლაშვილმა განუცხადა.
ადვოკატის განმარტებით, ის ალდამოვთან პოზიციებს შეაჯერებს და ისაუბრებს იმასთან დაკავშირებით, გაასაჩივრებს თუ არა პატიმრობის შეფარდებას სააპელაციო სასამართლოში.
„პირველ შეხვედრაზეც და სასამართლოზეც ვუთხარი, რომ კითხვებს არ დავუსვამდი. კარგად დაფიქრდი და მერე გავიაროთ ყველა დეტალი, აქ რაც გაჟღერდა, ყველაფერზე იფიქრე, შეიძლება შენდა გაუცნობიერებლად მართლა გქონდა ამ სახელებთან შეხება და არ იცოდი რომ ტერორისტები იყვნენ-მეთქი.
ვთხოვე, იმ ჩეჩნების გვარები, ან ის გაეხსენებინა, მათი მეგობარი ვინმე ხომ არ დაკავშირებია და მათთან შეხება ხომ არ ჰქონია. რაღაც კავშირი აუცილებლად იქნება და შენ არ იცოდი, რომ ისინი ტერორისტები იყვნენ და ამ პრობლემებში გაეხვიე, უნდა დამეხმარო, რაღაცაშია საქმე, რომ აგიყვანეს, რაღაც აუცილებლად იქნება, ამიტომ უნდა გაიხსენო-მეთქი. ასე ვერ ვიხსენებ, ფოტოებს მაინც თუ მაჩვენებენ, იქნებ ვინმე გავიხსენოო“, - განაცხადა კუბლაშვილმა.
სუს-მა 26 დეკემბერს 5 პირი დააკავა, აქედან 4 პანკისში, ერთი კი - თბილისში. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად. პანკისში ჩატარებული სპეცოპერაციის დროს ერთი პირი - თემირლან მაჩალიკაშვილი დაიჭრა. ის თელავის რეფერალური საავადმყოფოდან თბილისში გუშინ გადმოიყვანეს.
