ბათუმში, სამშენებლო ობიექტზე დაშავებული მამაკაცი ტექნიკის შესამოწმებლად იყო მისული.
მიწვეული ექსპერტი სასწრაფო-სამედიცინო დახმარების ბრიგადამ, თავის ტრავმით, რეფერალურ საავადმყოფოში გადაიყვანა.
ექიმის განცხადებით, პაციენტი რეანიმაციულ განყოფილებაში იმყოფება. მისი ჯანმრთელობის მდგომარეობა სტაბილურად მძიმეა.
ობიექტზე სამუშაოებს კომპანია "ანაგი" აწარმოებს. როგორც კომპანიის წარმომადგენელმა განცხადა, დაშავებული მათი თანამშრომელი არ არის.
„ის როგორც ექსპერტი, ამწეს ტექნიკური შემოწმებისთვის იყო ობიექტზე. კიბეზე ასვლის დროს დაუცურდა ფეხი და დაახლოებით მეხუთე სართულის სიმაღლიდან ჩამოვარდა“, - აცხადებენ კომპანიაში.
შინაგან საქმეთა სამინისტროს ინფორმაციით, მომხდარზე გამოძიება სსკ-ის 240-ე მუხლით მიმდინარეობს, რაც სამთო და სამშენებლო უსაფრთხოების წესების დარღვევას გულისხმობს.
შეგახსენებთ, შემთხვევა გუშინ, 27 დეკემბერს მოხდა.
