„ოთარ აბესაძის მდგომარეობა ამ წუთის მონაცემებით სტაბილურია. კარდიოგრამა უნდა გადაუღონ. თუკი, ამ კვლევის შედეგად აღმოჩნდება, რომ ის კარგადაა, შეუძლიათ დღეს გაწერონ“, - განუცხადა „ჯი-ეიჩ-ენს“ აბესაძის ადვოკატმა, ირმა ჭკადუამ.
მისი განმარტებით, აბესაძის ჯანმრთელობის მდგო0მარეობის შესახებ ჩაფიძის კლინიკის ექიმების დასკვნა, სამხარაულის ექსპერტიზის ეროვნული ბიუროს დასკვნასთან თანხვედრაშია.
„დღეს ექიმების კონსილიუმი იყო. მათ მიერ დასმული დიაგნოზი ფაქტობრივად სამხარაულის ექსპერტიზის ბიუროს დასკვნასთან თანხვედრაშია. აბესაძის ეს მდგომარეობა გულის პრობლემით არ არის გამოწვეული, ეს გულყრები უფრო თავის ტვინიდანაა წამოსული. ამას სხვა კვლევებიც დასჭირდება“, - აცხადებს ირმა ჭკადუა.
შეგახსენებთ, რომ გუშინ, ოთარ აბესაძემ ჯერ სასამართლოში დაკარგა გონება, მოგვიანებით კი, სასჯელაღსრულების მე-8 დაწესებულებაში გახდა შეუძლოდ. სასაწრაფო დახმარების ბრიგადამ ის ჩაფიძის კლინიკაში გადაიყვანა, სადაც აბესაძე ამ დრომდე რჩება.
ცნობისთვის, მერიის ყოფილი მაღალჩინოსანი, ოთარ აბესაძე მიმდინარე წლის 12 ივნისს, ქრთამის აღების ბრალდებით დააკავეს.
