თბილისის საქალაქო სასამართლოში ამ წუთებში პოეტ ზვიად რატიანის საქმის განხილვა მიმდინარეობს. მისი მხრიდან შესაძლო ადმინისტრაციულ სამართალდარღვევაზე მსჯელობა სასამართლომ რამდენიმე წუთის წინ დაიწყო.
დღევანდელ პროცესზე მხარეები იმ მტკიცებულებებზე იმსჯელებენ, რომელიც ზვიად რატიანის დაკავებას ასახავს. პროცესზე ასევე, სავარაუდოდ, გამოკვლეული იქნება სამხრე კამერების ჩანაწერები, სადაც შს სამინისტროს მტკიცებით ჩანს, რომ ზვიად რატიანი პოლიციას აგინებს.
შეგახსენებთ, რომ ზვიად რატიანი რამდენიმე დღის წინ ჩატარებული საპოლიციო კონტროლისას დააკავეს. მას სახელმწიფო ბრალდება წვრილმან ხულიგნობასა და პოლიციისთვის წინააღმდეგობის გაწევას ედავება. თავად რატიანი კი სამართალდამცველებს ძალადობასა და არაადამიანურ მოპყრობაში ადანაშაულებს. რატიანის განცხადებით, დაკავების შემდეგ პოლიციელებმა მას სასტიკად სცემეს. ზვიად რატიანის აღნიშნული განცხადების საფუძველზე პროკურატურამ გამოძიება პოლიციელების მხრიდან სავარაუდო უფლებამოსილების გადამეტების ფაქტზე დაიწყო.
