თბილისის საქალაქო სასამართლოში, რამდენიმე წუთის წინ, ბუტა რობაქიძის მკვლელობის საქმეზე შსს-ს ყოფილი მაღალჩინოსნების მიერ უფლებამოსილების ბოროტად გამოყენების საქმის განხილვა დასრულდა.

სასამართლოს ჩვენება კრიმინალური პოლიციის ყოფილმა თანამშრომელმა, ზაზა ადანაიამ მისცა. მისი განმარტებით, შემთხვევის ადგილზე იმ დროს მივიდა, როცა უკვე რამდენიმე პირი დაკავებული ჰყავდათ.

„მე რომ მივედი 4 თუ 5 ადამიანი იყო დაკავებული, მიწაზე იწვნენ...გარდაცვლილთან ახლოს არც მივსულვარ, დაკავებულების პირადი ჩხრეკის ჩატარება დაგვავალეს. რაც იქნა ამოღებული, ის დავაფიქსირეთ ოქმებში. ჩხრეკის მონაწილე ვიყავი და ოქმი სხვამ შეავსო“, - განაცხადა მოწმე ადანაიამ.

ადანაიას ჩვენების მიხედვით, დაკავებულებს წინააღმდეგობა არ გაუწევიათ.

ბრალდებულების მიერ დასმულ კითხვაზე, ხომ არ მიუღია რაიმე სახის მინიშნება ან მითითება, რომ იქ ფეთქებადი ნივთიერება ან საბრძოლო მასალა მიეტანათ, მოწმემ უპასუხა, რომ მსგავსს ადგილი არ ჰქონია.

მისივე განცხადებით, ჩხრეკის შედეგად ამოღებული იქნა ხელყუმბარა და ტყვიები. 

პროცესზე დაცვის მხარემ მოსამართლესთან დააყენა შუამდგომლობა ექსპერტიზის ჩატარებასთან დაკავშირებით, საუბარია დაკავების ოქმზე არსებულ ხემოწერაზე.

"არცერთ ქვეყანაში გამიგია, რომ ბრალდბულები ითხოვდნენ საქმის გამოძიებას და პროკურორი არ ეთანხმებოდეს. გამოიძიონ ვინ გააყალბა, ვისი ხელმოწერაა და ბეჭედი ვისია. ამას ექსპერტიზის დასკვნა უნდა. მოწმეს ვენდო მისი ხელმოწერაა თუ არა“?- განაცხადა ბრალდებულმა ირაკლი ფირცხალავამ.

აღსანიშნავია, რომ მოსამართლემ დაცვის მხარის შუამდგომლობა არ დააკმყოფილა.