„ოთარ აბესაძემ სასამართლოში გონება ჩვენს თვალწინაც დაკარგა“, - განუცხადა „ჯი-ეიჩ-ენს“ ოთარ აბესაძის ადვოკატმა, ირმა ჭკადუამ.
მიუხედავად იმისა, რომ აბესაძე სასამართლოში შეუძლოდ გახდა, ის მაინც სასჯელაღსრულების მე-8 დაწესებულებაში გადაიყვანეს. გადაყვანიდან რამდენიმე წუთში ის კვლავ შეუძლოდ გახდა და კარდიოლოგიური ჩივილით ჩაფიძის კლინიკაში მოათავსეს.
ადვოკატი აბესაძეზე მისი თანაპარტიელების მხრიდან შურისძიებაზე საუბრობს.
„ეს ნამდვილად შურისძიებაა, აბა რა არის? ხელისუფლება აბესაძეზე შურს იძიებს. გადაცდომის გარეშე დანაშაული არ მოხდება. შეცდა ეს ადამიანი, ხომ არ ამბობს, რომ ეს რაღაც არ გაუკეთებია? მთელი ძალით უნდათ აჩვენონ, თუ როგორი ძლიერია ეს სახელმწიფო და ერთ უსუსურ, გაუბედურებულ ადამიანს დაუმტკიცონ სახელმწიფოდ შევდეგქით და მაგრები ვართო? დღეს ოთარ აბესაძე იმის გამო ისჯება, რომ „ქართული ოცნების“ წევრია“, - აცხადებს ჭკადუა.
დღეს, თბილისის საქალაქო სასამართლომ ოთარ აბესაძე კვლავ პატიმრობაში დატოვა. მოსამართლე ნინო ნაჭყებიამ მხარის შუამდგომლობა, რომ მას აღკვეთის ღონისძიების სახით შეფარდებული პატიმრობა შეცვლოდა, არ დააკმაყოფილა, რადგან მისივე განმარტებით, აბესაძემ შესაძლოა მოწმეებზე ზემოქმედება მოახდინოს.
შეგახსენებთ, რომ მერიის ყოფილი თანამშრომელი, ოთარ აბესაძე მიმდინარე წლის 12 ივნისს, ქრთამის აღების ფაქტზე დააკავეს.
