ოთარ აბესაძის საქმის პროკურორის, ირაკლი მარშანიას განცხადებით, ექსპერტიზის დასკვნაში მითითებული არ არის, რომ აბესაძის ჯანმრთელობის მდგომარეობა მისი სასჯელაღსრულების დაწესებულებაში ყოფნასთან შეუთავსებელია. მისივე განმარტებით, მოსამართლემ ექსპერტიზის დასკვნა საკმარის არგუმენად არ ჩათვალა, რომ აბესაძისთვის შეფარდებული აღკვეთის ღონისძიება შეეცვალა.
„დაცვის მხარე აპელირებდა სამხარაულის ექსპერტიზის ბიუროს დასკვნაზე და ითხოვდა, რომ ბრალდებულს აღკვეთის ღონისძიების სახით შეფარდებული პატიმრობა შეცვლოდა, თუმცა ამ დასკვნაში არ იყო მითითებული ისეთი გარემოება, რომელიც ამბობს, რომ ოთარ აბესაძის ჯანმრთელობის მდგომარეობა შეუთავსებელია მისი სასჯელაღსრულების დაწესებულებაში ყოფნასთან. აქედან გამომდინარე, მოსამართლემ არ გაიზიარა დაცვის მხარის შუამდგომლობა და შეფარდებული აღკვეთის ღონისძიება ძალაში დატოვა", - აცხადებს ირაკლი მარშანია
დღეს, თბილისის საქალაქო სასამართლომ ოთარ აბესაძე კვლავ პატიმრობაში დატოვა. მოსამართლე ნინო ნაჭყებიამ მხარის შუამდგომლობა, რომ მას აღკვეთის ღონისძიების სახით შეფარდებული პატიმრობა შეცვლოდა, არ დააკმაყოფილა, რადგან მისივე განმარტებით, აბესაძემ შესაძლოა მოწმეებზე ზემოქმედება მოახდინოს.
შეგახსენებთ, რომ მერიის ყოფილი თანამშრომელი, ოთარ აბესაძე მიმდინარე წლის 12 ივნისს, ქრთამის აღების ფაქტზე დააკავეს.
