„ამ წუთებში თბილისის საქალაქო სასამართლოში სასწრაფო დახმარების ბრიგდაა მობილიზებული. პროცესზე მერიის ყოფილი მაღალჩინოსანი, ოთარ აბესაძე შეუძლოდ გახდა, რის გამოც მასთან სასწრაფო დახმარების გამოძახება გახდა საჭირო. ამის შესახებ „ჯი-ეიჩ-ენს“ აბესაძის ადვოკატმა, ირმა ჭკადუამ განუცხადა.
„ოთარ აბესაძის ჯანმრთელობასა და სიცოცხლეზე მთელ პასუხისმგებლობას სასამართლოს და სასჯელაღსრულების დაწესებულებას ვაკისრებ, კონკრეტულად, მე-8 დაწესებულებას, ვინაიდან, ისინი ჩვენთან კერძო საუბრებში აცხადებენ, რომ უმძიმესი შემთხვევაა, ხოლო როგორც პროკურატურა ამბობს, თურმე, სასჯელაღსრულება მათ ეუბნება, რომ პატიმარი კარგადაა.
ექსპერტიზის დასკვნაზე ვერ ვისაუბრებ, რადგან პროცესი დახურუილი იყო. თუმცა, შემიძლია გითხრათ, რომ ეს დასკვნა შემაშფოთებელი და ძალიან საყურადღებოა. პასუხისმგებლობა ციხის ადმინისტრაციამ, სასამართლომ და ექსპერტებმა უნდა აიღონ“, - განაცხადა ჭკადუამ.
დღეს, თბილისის საქალაქო სასამართლომ ოთარ აბესაძე კვლავ პატიმრობაში დატოვა. მოსამართლე ნინო ნაჭყებიამ მხარის შუამდგომლობა, რომ მას აღკვეთის ღონისძიების სახით შეფარდებული პატიმრობა შეცვლოდა, არ დააკმაყოფილა, რადგან მისივე განმარტებით, აბესაძემ შესაძლოა მოწმეებზე ზემოქმედება მოახდინოს.
შეგახსენებთ, რომ მერიის ყოფილი თანამშრომელი, ოთარ აბესაძე მიმდინარე წლის 12 ივნისს, ქრთამის აღების ფაქტზე დააკავეს.
